Bagong VAT Refund Program, inaasahang magpapasigla sa turismo ng Pilipinas

MAYNILA. Kumpiyansa ang gobyerno na ang bagong ipinatutupad na Value-Added Tax (VAT) refund program para sa mga dayuhang turista ay makakatulong sa pagpapalakas ng turismo at retail sectors ng bansa.

Sa isang press briefing sa Malacañang, sinabi ni Presidential Communications Office (PCO) Undersecretary at Palace Press Officer Claire Castro na ang bagong programa ay bahagi ng inisyatiba ng pamahalaan upang mapataas ang bilang ng mga turistang bumibisita sa bansa at mahikayat silang gumastos nang mas malaki, na makakatulong din sa paglago ng ekonomiya.

“Ito po ay isang paraan lamang po para mas marami pong turista ang pumunta sa ating bansa at ito din po ay makakapag-engganyo rin po na bumili ng mga produkto dito sa ating bansa,” ayon kay Castro.

Dagdag pa niya, layunin ng programa na gawing mas competitive shopping destination ang Pilipinas upang mas maraming turista ang mamili rito.

Pirmahan ng IRR para sa VAT Refund

Kamakailan, nilagdaan ng mga opisyal ng Department of Finance (DOF), Bureau of Customs (BOC), at Bureau of Internal Revenue (BIR) ang implementing rules and regulations (IRR) para sa VAT Refund for Non-Resident Tourists.

Sa ilalim ng Republic Act 12079, ang mga non-resident tourists o foreign passport holders ay maaaring mag-apply para sa VAT refund sa mga locally purchased goods mula sa mga accredited stores, kung ang halagang binili ay hindi bababa sa ₱3,000 at dadalhin palabas ng bansa bilang accompanied baggage sa loob ng 60 araw mula sa petsa ng pagbili.

Pinirmahan ang IRR nina Finance Secretary Ralph Recto, Bureau of Customs Commissioner Bienvenido Rubio, at Bureau of Internal Revenue Deputy Commissioner Marissa Cabreros, sa harap nina Tourism Secretary Christina Garcia-Frasco at Office of the Special Assistant to the President for Investment and Economic Affairs Secretary Frederick Go.

Mas Maginhawang Transaksyon para sa mga Turista

Sa isang pahayag, binigyang-diin ni Recto ang kahalagahan ng programa upang mahikayat ang mas maraming turista na bumisita, manatili nang mas matagal, at gumastos nang mas malaki.

“We want more tourists to come — and we want them to stay longer, spend bigger, and transact with convenience,” ani Recto sa ceremonial signing.

Ayon sa DOF, gagamitin ng pamahalaan ang serbisyo ng internationally recognized VAT refund operators upang magbigay ng end-to-end solutions para sa mas mabilis at episyenteng pagbabalik ng VAT refund. Maaaring gawin ang refund electronically o sa cash.

“With a multiplier effect of 1.97, every 100 pesos spent by a tourist generates 197 pesos in economic output. Imagine that. Halos doble ang balik sa ekonomiya,” paliwanag ni Recto.

“And more money spent by foreign tourists means more businesses created, more Filipino workers hired, more jobs provided, higher incomes for our people, and more revenues for the government to collect. That’s the simple formula for growth,” dagdag niya.

Pilipinas bilang Global Shopping Destination

Ang VAT refund program ay bahagi ng mas malawak na plano ng administrasyon ni Pangulong Ferdinand Marcos Jr. upang palakasin ang turismo at gawing premier global shopping destination ang Pilipinas.

“Our shared goal should be clear: Tourists should leave the Philippines with more than just souvenirs. They should leave knowing that this is a country that delivers on its promises. A country that knows how to take good care of its guests. A country that doesn’t just welcome them with smiles—but with systems and policies that work,” saad ni Recto.

“For if we do things right, in the eyes of our visitors, we won’t just be a country of pristine beaches and warm hospitality. We’ll be that one ultimate tourist destination they’ll keep coming back to. Again and again,” dagdag pa niya.

Sa patuloy na pagpapatupad ng mga proyektong tulad ng VAT refund program, umaasa ang pamahalaan na higit pang lalago ang turismo sa Pilipinas at magiging mas kaakit-akit ang bansa sa mga mamimiling dayuhan.