San Jose, Occidental Mindoro.  Sinukat at tiniyak na ang mga hangganan ng 98,747.8750 ektaryang ancestral domain ng mga tribong Buhid at Bangon, dalawa sa pitong tribo ng Mangyan sa lalawigan ng Mindoro.

Ang nabanggit na lupaing ninuno ay nasasakupan ng San Jose, Rizal, Calintaan, Sablayan hanggang sa ilang bahagi ng Oriental Mindoro.

Batay sa isinagawang survey ng Department of Environment and Natural Resources (DENR) sa pamumuno ni CENRO Efren I. Delos Reyes at ng Department of Agriculture (DAR), nakita sa mga hangganan ng nabanggit na ancestral domain ang mga lumang muhon na inilagay noon pang 2003 sa tulong ng National Commission on Indigenous Peoples (NCIP) na pinatotohanan naman ng mga “gurangon” o nakatatandang Mangyan.

Matapos ang isinagawang pagsusuri at pagtitiyak sa mga boundaries, ang mga nabanggit na tribo ay maghihintay na lamang ng titulo o Certificate of Ancestral Domain Title (CADT) na inaasahang igagawad sa lalong madaling panahon.

Ang pagkakaroon ng CADT ay mahalaga sa mga nabanggit na tribo upang sila ay mapangalagaan sa dumadaming migrants na naninirahan at nagsasaka sa mga laylayan ng kanila lupaing ninuno. Ito ay magbibigay proteksyondin sa kanila sa mapanakop na modernisasyon. Sa tulong din ng CADT ay mapapangalagaan ang ecological balance sa pamamagitan ng pagmamalasakit sa flora at fauna, sa mga watershed at iba pang reserve gayon din ang pangangalaga at pagpapaunlad ng mga punong kahoy sa gubat.

Samantala, lubos na nagpapasalamat si Indigenous Peoples Mandatory Representative (IPMR) Ding “Talon” de Jesus sa lahat ng bumubuo ng Sangguniang Bayan ng San Jose sa pamumuno ni San Jose Vice Mayor Rod Agas, sa tanggapan ng DENR, DAR, kay Occidental Mindoro Governor Eduardo Gadiano, Occidental Mindoro District Representative Josephine Ramirez-Sato, San Jose Mayor Romulo Festin at sa lahat ng ahensya ng gobyerno at NGO na sumuporta sa matagumpay na pagtitiyak ng Buhid-Bangon Ancestral Domain.

Si de Jesus ang unang IPMR ng mamamayang Mangyan na kumakatawan sa Sangguniang Bayan ng San Jose bilang isang konsehal. Kasama din siya sa mga unang nagtaguyod at kumilos sa pagsisikap na makakuha ng Certificate of Ancestral Domain ang mga nabanggit na tribo.

Tanza, Cavite. Kinumpiska ng mga miyembro ng  Bureau of Customs-Port of Manila (BOC-POM) sa isang warehouse sa bayang ito kahapon ang Php500M na halaga ng mga puslit na paninda.

Ayon sa report ng POM’s Customs Intelligence and Investigation Service Field Office (CIIS) at ng Enforcement and Security Service (ESS), ang mga kontrabando ay nadiskubre sa isang bodega sa  9172 Antero Soriano Highway, Barangay Mulawin sa nabanggit na bayan.

Kasama sa mga kinumpiska ang mga sari saring pagkaing gawa sa China, mga inumin, medical protective mask at mga huwad na Jordan, Nike, Crocs, and Havaianas at iba pang sikat na brand.

Batay sa paunang imbestigasyon, ang mga smuggled na paninda ay ipinamamahagi ng isang lokal na grupo ng mga Intsik sa pangunguna ng nina Anna Ty at Willy Zhang.

Sina Ty at Zhang ay sasampahan ng kasong paglabag sa Section 1114 ng Republic Act 10863 o Customs Modernization and Tariff Act.