₱20 na Bigas, itinigil muna: DA sumunod sa utos ng Comelec

By
Carlo Juancho Funtanilla
-
0
27

Sinuspindeng subsidiya, pansamantalang hinto hanggang matapos ang Eleksyon 2025

MAYNILA. Pansamantalang sinuspinde ng Department of Agriculture (DA) ang programang pagbebenta ng ₱20 kada kilong bigas sa Cebu, isang araw lamang matapos ang inilunsad nitong rollout noong Mayo 1.

Ayon kay DA Secretary Francisco Tiu Laurel Jr., ang hakbang ay tugon sa utos ng Commission on Elections (Comelec) na ihinto ang implementasyon ng programa alinsunod sa mga alituntunin ng election ban.

“Todo-suporta si Pangulong Marcos sa proyekto pero minabuting itigil muna ito,” ani Laurel, habang nilinaw niyang layunin ng DA ang makatulong sa mga nangangailangan ngunit kailangang sumunod sa batas sa gitna ng election season.

Sa unang araw ng rollout, ipinagbili ang bigas sa halagang ₱20 bawat kilo, kung saan limitado lamang sa hanggang 10 kilo kada indibidwal. Prayoridad ng programa ang mga senior citizen, solo parent, at persons with disabilities (PWD).

Naging positibo ang pagtanggap ng publiko sa subsidized rice program ngunit kinailangang ipatigil muna habang umiiral ang election-related prohibitions.

Hindi pa tinutukoy ng DA kung kailan ito muling ipagpapatuloy, ngunit tiniyak nitong agad na ibabalik ang programa matapos ang Eleksyon 2025.

Patuloy pa rin ang monitoring ng DA sa presyo ng bigas sa merkado at magsasagawa ng mga alternatibong hakbang upang matulungan ang mga mahihirap na sektor habang naka-hold ang nasabing proyekto.

Author profile

Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo

Related entries

We appreciate your thoughts. Please leave a comment.