Dumating sa bansa noong Miyerkules ng hapon, Oktubre 18, ang unang batch ng 16 Filipino repatriates mula sa Israel. Ang mga ito ay mga Pilipinong nagpasyang umalis na sa Israel sa gitna ng patuloy na giyera sa pagitan ng mga Israeli at Hamas militant group.
Sinalubong sila ni Department of Migrant Workers (DMW) Officer-in-Charge na si Hans Leo Cacdac, kasama si Senador Raffy Tulfo, na Chair ng Senate Committee on Migrant Workers. Kasama rin si OFW Party-list Rep. Marissa Magsino, at ang mga Deputy Directors General ng Technical Education and Skills Development Authority (TESDA) na sina Aniceto D. Bertiz III at Vidal V. Villanueva.
Ang mga ahensya ng pamahalaan ay handang magbigay ng tulong sa mga OFW, kabilang ang psycho-social counseling, stress debriefing, medical referral, at temporary shelter habang naghihintay sila ng biyahe pauwi sa kanilang mga probinsya.
Sa kabila ng mga pagsubok, ang mga repatriates na ito ngayon ay ligtas na at nasa sariling bansa. Nagsilbing paalala ito ng mahalagang papel na ginagampanan ng pamahalaan sa pagsuporta at proteksyon sa mamamayan na nasa ibang bansa, lalo na sa mga oras ng krisis.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
