MAYNILA. Iniulat ng Philippine Coast Guard (PCG) na nakolekta nila ang kabuuang 790 litro ng oil-water mixture at limang sako ng kontaminadong debris mula sa MV Mirola 1 na sumadsad sa Bataan.
“As of today, 05 August 2024, the PCG recovered 790 liters of oil-water mixture and five sacks of contaminated oil debris using absorbent pads,” ayon sa ipinalabas na update ng PCG noong nakaraang araw.
Ayon sa PCG, patuloy ang kanilang oil recovery at containment operations sa barko, gayundin ang pagmo-monitor sa mga oil spill booms upang maiwasan ang pagkalat ng langis.
Matatandaang noong Hulyo 31 nang sumadsad ang MV Mirola 1 sa karagatang sakop ng Sitio Quiapo, Barangay Biaan, Mariveles, Bataan, kaya’t agad na nagsimula ang PCG ng oil recovery operations.
Bukod dito, tinutugunan din ng PCG ang pagtagas ng langis mula sa mga motor tankers na MT Terranova, na may lulang 1.4 milyong litro ng industrial fuel oil, at MT Jason Bradley na may 5,500 litro ng diesel.
3 Barko na Lumubog sa Bataan, Iniimbestigahan sa ‘Oil Smuggling’
Kasabay ng mga operasyon, sinabi ng PCG na iniimbestigahan na ang tatlong barko na responsable sa oil spill sa Bataan dahil sa posibleng pagkakasangkot sa oil smuggling o “paihi” sa ibang barko habang nasa dagat.
Ayon kay PCG National Capital Region (NCR)-Central Luzon spokesperson Lieutenant Commander Michael John Encina, inaalam ng kanilang investigating team ang totoong dahilan ng pagkakasadsad ng MT Terranova, MT Jason Bradley, at MV Mirola 1.
Sa sistemang “paihi,” ang langis mula sa malaking barko ay ililipat sa mas maliit na sasakyang-dagat sa dagat upang maiwasan ang pagbabayad ng buwis.
Sinabi ni Encina na maingat silang nakikipag-ugnayan sa ibang ahensya para sa karagdagang tulong at kapag may resulta na, ilalabas nila ito upang maging transparent sa publiko tungkol sa sanhi ng insidente.
Ayon kay Justice Undersecretary Raul Vasquez, tinitingnan ng Department of Justice (DOJ) ang posibleng “conspiracy” na maaaring nagdulot sa kamakailang sakuna sa dagat na kinasasangkutan ng tatlong barko na nag-leak ng libu-libong litro ng gasolina sa Manila Bay.
Sinabi ni Justice Secretary Jesus Crispin Remulla noong Biyernes na tinitingnan ng DOJ ang posibilidad ng pagsasampa ng class suit laban sa mga responsable sa oil spill, at nabanggit din niyang ang tatlong sasakyang-dagat ay “magkakaugnay,” ngunit hindi pa nagbibigay ng karagdagang detalye.
Sa gitna ng imbestigasyon ng PCG’s Marine Casualty Investigation Team, tiniyak ni Encina na sisiguraduhin nilang hindi makakatakas ang mga responsable sa oil spill. Ang mga kumpanya ng mga barkong ito ay nakikipagtulungan sa mga awtoridad matapos ang tatlong magkakahiwalay na insidente.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
