Naglabas ng executive order (EO) si Pangulong Ferdinand R. Marcos Jr. na nag-uutos sa patuloy na pag suspinde sa mga operasyon ng electronic sabong o e-sabong sa buong bansa.
Nilagdaan ni Marcos ang EO No. 9 noong Disyembre 28 upang tiyakin ang “pinaka-importanteng obligasyon ng estado na protektahan ang kalusugan at moral ng publiko, at itaguyod ang kaligtasan ng publiko at pangkalahatang kapakanan.”
“There is an urgent need to reiterate the continued suspension of all e-sabong operations nationwide, clarify the scope of existing regulations and direct relevant agencies to pursue aggressive crackdown against illegal e-sabong operations, in accordance with law,” ayon sa EO.
Sa ilalim ng EO, sususpindihin ang live-streaming o pag sa himpapawid ng mga live na sabong sa labas ng mga sabungan o arena ng sabong o lugar kung saan ginaganap ang mga sabong.
Sinususpinde rin ng EO 9 ang online/remote, o off-cockpit na pagtaya sa mga live na laban sa sabong at/o mga aktibidad na na-stream o nai-broadcast nang live, anuman ang lokasyon ng platform ng pagtaya.
Ang mga operasyon ng mga tradisyunal na sabong na awtorisado o lisensyado sa ilalim ng mga umiiral na batas ay hindi sakop ng suspensyon.
Inatasan din ng EO 9 ang Philippine Amusement Gaming Corporation (PAGCOR) na makipag-ugnayan sa mga local government units (LGUs), iba pang kaukulang ahensya ng gobyerno at pribadong entity sa pagpapatupad ng kautusan.
Ang Department of the Interior and Local Government (DILG) at ang Philippine National Police (PNP) ay inaatasan din na magbigay ng kinakailangang tulong sa PAGCOR sa pagpapatupad ng kautusan at dapat magsagawa ng kaukulang aksyon laban sa mga lumalabag, alinsunod sa batas.
Ang PAGCOR, sa pakikipag-ugnayan sa DILG at PNP, ay higit na naatasang magsumite ng mga regular na ulat sa Pangulo sa pamamagitan ng Office of the Executive Secretary.
Ipinag-utos ni dating Pangulong Rodrigo Duterte na wakasan ang online cockfighting operations na kilala bilang e-sabong noong Mayo 3 ngayong taon dahil sa pagkawala ng hindi bababa sa 34 na sabungero o e-sabong aficionados sa bansa na pawang nananatiling nawawala hanggang ngayon.
Itinigil na ng mga mayor na operator ng e-sabong ang operasyon. Gayunpaman, maraming maliliit na grupo at indibidwal ang patuloy na gumagamit ng online na platform para sa pagtaya sa sabong.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
