PAKIL, LAGUNA. Sa isang makasaysayang pagkakataon, opisyal na pinasinayaan ang bagong bahay-pamahalaan ng Bayan ng Pakil, Laguna. Matatagpuan ang bagong munisipyo sa crossing ng Brgy. Tavera, na ngayon ay nagiging simbolo ng pag-unlad at modernisasyon ng bayan.
Ang mga mamamayan ng Pakil ay matagal nang naghangad na magkaroon ng isang pasilidad na magiging sentro ng kanilang lokal na pamahalaan. Ngayon, ang kanilang pangarap ay natupad na sa tulong ng modernong disenyo at konsepto ni Architect Mark Angelo Bonita ng Brgy. Kabulusan.
Ang bagong bahay-pamahalaan ay binubuo ng dalawang seksyon, na kumakatawan sa dalawang territorial na bahagi ng bayan, ang Kanluran at Silangang Pakil. Ang dalawang seksyon ay konektado sa isang atrium na sumisimbolo sa kanilang pagkakaisa at pagmamahal sa kalikasan, partikular na sa Laguna de Bay.
Sa kaliwa, may anim na vertical lines na kumakatawan sa anim na Barangay ng Kanlurang Pakil, habang sa kanan, may anim na vertical lines din na kumakatawan sa pitong Barangay ng Silangang Pakil. Ang mayor’s office ay matatagpuan sa pagitan ng dalawang seksyong ito na nagpapakita ng pangako na magbigay ng inklusibo, napapanahon, pantay, at epektibong pamamahala at pagseserbisyo sa mga mamamayan.
Dumalo sa seremonya ng pagbubukas si Quezon City Councilor Alfred Vargas bilang panauhing pandangal. Nagpadala rin ng mga mensahe sa video sina Sen. Lito Lapid at iba pang mga alkalde mula sa iba’t ibang bayan sa Laguna.
Dumalo rin sa okasyon sina Mayor Rellosa ng Famy, Mayor Elmor Vita ng Nagcarlan, Mayor Romy Amorado ng bayan ng Majayjay, mga kawani ng pamahalaan, Vice Mayor Vipops Martinez, at buong sanggunian bayan kasama ang mga opisyal ng mga barangay.
Sa kabuuan, ang bagong munisipyo ng Pakil ay isang simbolo ng modernisasyon at pag-usbong ng kanilang bayan. Ito ay nagpapakita ng kanilang pagyakap sa makabago at maka uring pag-iisip, paggawa, at pag uugali. Ang mga mamamayan ng Pakil ay may malasakit na naghahanda para sa mas magandang kinabukasan, at ang bagong pasilidad na ito ay isang patunay na ang kanilang pangarap ay patuloy na natutupad.
Kevin Pamatmat
Si Kevin Pamatmat ay miyembro ng Camp Vicente Lim Press Corps. Nagsimula siya sa larangan ng pamamahayag bilang photojournalist at news correspondent noong 2004. Broadcaster din siya sa DZJV 1458 Radyo Calabarzon at Balita Ngayon Online News.
