MAYNILA. Pinalawig ng Commission on Elections (Comelec) ang deadline para sa paghahain ng mga petisyon laban sa mga kandidatong itinuturing na “nuisance candidates” sa darating na halalan.
Ayon sa Comelec, ang bagong deadline ay itinakda mula Lunes, Oktubre 14, 2024, hanggang Miyerkules, Oktubre 16, 2024, mula 8:00 a.m. hanggang 5:00 p.m. Inanunsyo ito ng komisyon kasunod ng Comelec Memorandum noong Oktubre 11, 2024, na kaugnay ng Memorandum Circular No. 66 mula sa Office of the President tungkol sa suspensyon ng trabaho sa mga lungsod ng Maynila at Pasay sa Oktubre 14 at 15.
“Please take notice that the Commission (en banc) approved the extension of the deadline for the filing of Petitions Against Nuisance Candidates from Monday, 14 Oct. 2024 to Wednesday, 16 Oct. 2024, from 8 a.m. to 5 p.m., in view of Comelec Memorandum dated 11 October 2024, in relation to Memorandum Circular No. 66 of the Office of the President on work suspension in the Cities of Manila and Pasay on 14 and 15 October 2024,” ayon sa abiso ng komisyon.
Ang pagpapalawig ng deadline ay kaugnay ng suspensyon ng trabaho sa gobyerno na ipinag-utos ng Malacañang para bigyang-daan ang pagsasagawa ng isang international event, ang Asia-Pacific Ministerial Conference on Disaster Risk Reduction (APMCDRR), na gaganapin sa Pasay City. Inaasahan ng mga awtoridad na magdudulot ito ng matinding daloy ng trapiko dahil sa pagdating ng mga delegado mula sa iba’t ibang bansa.
Ipinaliwanag din ng Comelec na ang publiko ay binibigyan ng limang araw matapos ang paghahain ng certificates of candidacy upang maghain ng petisyon laban sa mga kandidatong nais tumakbo sa pambansa o lokal na posisyon sa May 2025 midterm elections.
Ang pagpapalawig na ito ay inaasahan na magbibigay ng mas maraming oras para sa mga reklamo laban sa mga nuisance candidates na nagsisilbing sagabal sa tunay na proseso ng halalan.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
