MAYNILA — Naniniwala ang Malacañang na dapat imbestigahan kung paano napunta kay Batangas Rep. Leandro Leviste ang umano’y “Cabral files,” kasabay ng paglilinaw ng Philippine National Police (PNP) na nagpadausdos, at hindi itinulak, ang yumaong dating Department of Public Works and Highways (DPWH) Undersecretary Ma. Catalina Cabral batay sa forensic findings.
Ayon kay Palace Press Officer Undersecretary Atty. Claire Castro, mahalagang tukuyin ang pinagmulan at paraan ng pagkuha ng mga sinasabing dokumento na iniuugnay kay Cabral. Batay sa impormasyong kanyang naririnig, posibleng nakuha umano ang mga files mula sa computer ng staff ng yumaong opisyal.
Binigyang-diin ni Castro na kung ang mga dokumento ay hindi direktang nagmula kay Cabral, kinakailangang siyasatin kung paano ito nailipat at kung alin sa mga ito ang maaaring ma-authenticate. Nilinaw rin niya na hindi pa nakikita ni DPWH Secretary Vince Dizon ang mga nasabing dokumento, kaya’t hindi pa matitiyak kung ang mga ito ay totoo o hindi.
Dagdag pa ni Castro, kung mapatutunayang ilegal na nakuha ang mga dokumento, maaaring mawalan ng saysay ang mga ito. Aniya, nais ng publiko ang buong katotohanan kaya’t nararapat na ilantad at suriin ang sinasabing “Cabral files” upang malinawan ang isyu na matagal nang sinusubaybayan ng taumbayan.
Samantala, sa hiwalay na ulat, sinabi ng PNP na nagpadausdos si Cabral bago bumagsak sa bangin sa Tuba, Benguet, batay sa three-dimensional (3D) scan ng crime scene. Sa isang press briefing sa Camp Crame, ipinaliwanag ni PNP Forensic Group officer-in-charge Col. Pierre Paul Carpio na bumagsak ang biktima sa lokasyong humigit-kumulang 0.2 meters lamang mula sa paanan ng bangin, mula sa tinatayang 16.9 metrong taas kung saan siya huling namataan.
Ayon kay Carpio, kung itinulak si Cabral, inaasahang mas malayo ang magiging layo ng kanyang paghuhulugan. Nakitaan din umano ng mga gasgas sa kamay at likod ang biktima—mga palatandaang posibleng nagpadausdos siya pababa sa halip na tuluyang mahulog.
Batay sa autopsy report, tinatayang namatay si Cabral bandang alas-3:00 hanggang alas-5:00 ng hapon noong December 18 dahil sa “blunt traumatic injuries” na dulot ng pagbagsak mula sa mataas na lugar. Kinumpirma rin ng PNP na ang postmortem fingerprints ng labi ni Cabral at ang computer-generated fingerprints mula sa National Bureau of Investigation ay tumutugma, na nagpapatibay sa kanyang pagkakakilanlan.
Bukod dito, lumabas sa paunang toxicology report ng Cordillera police forensic unit na positibo sa antidepressant ang dating opisyal. Patuloy pa ring iniimbestigahan ng mga awtoridad ang insidente upang mabuo ang kabuuang larawan ng mga pangyayari sa likod ng pagkamatay ni Cabral.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
