MAYNILA — Inanunsyo ng Criminal Investigation and Detection Group (CIDG) nitong Martes ang pagkakaaresto sa isa pang Chinese national na sinasabing sangkot sa human trafficking case na kinasasangkutan nina dating presidential spokesperson Harry Roque at negosyanteng si Cassandra Ong.
Ayon sa CIDG, nadakip ang suspek bandang alas-11:30 ng umaga noong Lunes sa isinagawang manhunt operation sa Pampanga, batay sa warrant of arrest na inilabas ng korte sa Angeles City noong Mayo 8. Walang inirekomendang bail ang korte.
Kinilala ng CIDG ang suspek bilang isang administrative officer ng Lucky South 99 Outsourcing Inc., isang Philippine offshore gaming operator (POGO) hub sa bayan ng Porac, Pampanga, na iniuugnay ng mga awtoridad sa iba’t ibang ilegal na aktibidad.
Ayon sa pulisya, ang suspek na kilala sa alyas na “Boss Terry” ay inakusahan ng pagkakasangkot sa pagpapahirap sa mga Chinese POGO employee na nagkakasala o lumalabag sa patakaran.
Ang pinakahuling pag-aresto ay kasunod ng mga naunang operasyon ng awtoridad kaugnay ng parehong kaso. Noong Mayo 22, 2025, inaresto sa Mabalacat City ang isang suspek na kinilalang si “Marlon,” na sinabing operations officer ng security agency na naka-duty nang maganap ang umano’y trafficking. Makalipas ang isang linggo, isa pang suspek na kinilalang “Mariano,” isang security guard, ang naaresto sa Clark Development Corporation Public Safety Division sa Clark.
Pinuri ni CIDG acting director Police Major General Robert Morico II ang mga operating unit na nagsagawa ng pag-aresto at iginiit na magpapatuloy ang operasyon hanggang sa matunton at madakip ang lahat ng natitirang akusado.
Mariing itinanggi ni Roque ang mga paratang laban sa kanya, iginiit na hindi siya at hindi kailanman naging legal counsel ng anumang ilegal na POGO, at hindi rin siya naging counsel ng Lucky South 99 Outsourcing Inc. Ayon pa sa kanya, minsan lamang niyang sinamahan si Ong sa isang pulong dahil inakala niyang biktima ito ng estafa.
Kasalukuyang humihingi ng asylum sa Netherlands ang dating presidential spokesperson.
Samantala, sinabi noon ni Interior and Local Government Secretary Jonvic Remulla na posibleng nakatakas na patungong China si Ong.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
