MAYNILA — Handa ang National Bureau of Investigation (NBI) na ipatupad ang pag-aresto kay Sen. Jinggoy Estrada matapos magpalabas ang Sandiganbayan ng warrant of arrest kaugnay ng kasong graft na may kinalaman sa umano’y budget insertions at kickbacks sa flood control projects.
Ayon kay NBI Director Atty. Melvin Matibag, agad nilang ipatutupad ang utos sa sandaling matanggap ang kopya ng warrant.
“As soon as we get hold of the warrant, we will enforce it,” ani Matibag sa isang pulong balitaan nitong Biyernes.
Dagdag niya, kung kinakailangan ay handa silang pumasok sa Senado upang ipatupad ang arrest order, tulad ng nauna nilang naging hakbang sa ibang kaso. Bukas din aniya ang NBI sa posibilidad na sa kanilang pasilidad ikulong si Estrada, ngunit nasa pagpapasya pa rin ng Sandiganbayan kung saan ito ikukustodiya habang dinidinig ang kaso.
Samantala, nagbayad ng piyansang nagkakahalaga ng P90,000 si Estrada matapos ilabas ng Sandiganbayan ang warrant of arrest at hold departure order (HDO) laban sa kanya.
“Posting bail is a legal remedy available to me under our justice system, and I intend to avail myself of every lawful means to defend myself and clear my name,” pahayag ni Estrada.
Naghain din ang kanyang legal team ng mosyon para ipawalang-bisa ang warrant of arrest, habang iginiit ng senador na walang basehan at may malisyang motibo ang mga akusasyon laban sa kanya.
Iniulat na kinokonsidera ng Sandiganbayan Fifth Division ang mosyon bago tuluyang magpatupad ng arrest warrant sa non-bailable plunder case na isinampa laban sa senador.
Samantala, nagpakita rin sa Sandiganbayan si dating Department of Public Works and Highways (DPWH) Secretary Manuel Bonoan, kapwa akusado sa kaso, upang magpiyansa.
Nauna rito, sinabi ni Interior Secretary Jonvic Remulla na may opsyon si Estrada na sumuko o harapin ang pag-aresto. Binanggit din ni Remulla na isinasaalang-alang ang kalagayang medikal ng senador, kabilang ang umano’y pangangailangan nito ng knee replacement surgery, ngunit iginiit na nasa Sandiganbayan ang pinal na desisyon sa paghawak ng kustodiya.
Nadawit si Estrada sa kaso matapos akusahan ni dating DPWH-Bulacan District Engineer Brice Hernandez na tumanggap umano siya ng kickbacks mula sa mga flood control projects, na mariin namang itinanggi ng senador.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
