MAYNILA – Inihayag ni US Ambassador to the Philippines Lee Lipton na pinabibilis ng Pilipinas at Estados Unidos ang pagpapatupad ng Pax Silica initiative, isa sa mga prayoridad ng dalawang bansa sa ilalim ng Luzon Economic Corridor. Gayunman, kasabay ng pagsusulong ng proyekto ay lumalakas din ang pagtutol ng iba’t ibang grupo na nananawagang busisiin ang posibleng epekto nito sa kapaligiran, likas na yaman, at mga komunidad na maaapektuhan.
Sa isang post sa X noong Hulyo 31, sinabi ni US Ambassador to the Philippines Lee Lipton na nagkaroon siya ng “great meeting” kay Executive Secretary Ralph Recto upang talakayin ang pagpapabilis ng implementasyon ng Luzon Economic Corridor at ng Pax Silica, na aniya ay kabilang sa pinakamahalagang prayoridad ng dalawang bansa.
“Just had a GREAT meeting with Executive Secretary Ralph Recto, one of the Philippines’ top economic leaders! We’re moving FAST on the Luzon Economic Corridor and Pax Silica. HUGE priorities for America and our Filipino #PartnersInProsperity,” ani Lipton.
Nauna ring nagpahayag ng suporta si Defense Secretary Gilberto Teodoro Jr., na nagsabing ang Pax Silica ay isang hakbang tungo sa pagpapalakas ng pambansang katatagan at seguridad.
Sa kanyang State of the Nation Address, sinabi ni Pangulong Ferdinand Marcos Jr. na ang Pax Silica Industrial Hub ay magiging sentro ng AI-driven industries at advanced manufacturing.
“The Pax Silica Industrial Hub will create an ecosystem that will have AI at its core. It will bring quality jobs to our people, accelerate our industrial competitiveness, and revitalize our economy,” ayon sa Pangulo.
Ang Pax Silica Economic Security Zone ay nakapaloob sa Luzon Economic Corridor, isang inisyatibong inilunsad ng Pilipinas, Estados Unidos, at iba pang mga partner country upang palakasin ang pamumuhunan sa semiconductors, critical minerals processing, advanced manufacturing, logistics, at digital infrastructure.
Sa kabila ng magagandang pangako, tumitindi pa rin ang pagtutol ng iba’t ibang grupo na nagsasabing hindi pa sapat ang mga kasagutan ng pamahalaan sa mga posibleng panganib ng proyekto.
Binabatikos ng mga environmental advocates at ilang people’s organizations ang posibilidad na mangailangan ang malalaking AI data centers at semiconductor facilities ng napakalaking suplay ng tubig at kuryente, na maaari umanong makipag-agawan sa pangangailangan ng mga residente, magsasaka, at lokal na industriya, lalo na sa panahon ng tagtuyot.
Nagbabala rin ang ilang grupo na ang malawakang industrial development ay maaaring magdulot ng pagkawala ng lupang agrikultural, pagkasira ng watershed at biodiversity, pagtaas ng greenhouse gas emissions, at mas malaking panganib ng polusyon kung hindi mahigpit na maipatutupad ang environmental safeguards.
May mga organisasyon ding nagtatanong kung sino ang higit na makikinabang sa proyekto. Ayon sa kanila, may panganib na mas mapaboran ang malalaking dayuhang korporasyon kaysa sa mga lokal na negosyo at komunidad, habang ang mga magsasaka at residente ay maaaring mawalan ng lupang sinasaka at kabuhayan dahil sa land conversion at industrial expansion.
Iginiit din ng ilang kritiko na dapat munang maging ganap na malinaw sa publiko ang environmental impact assessments, water demand projections, energy requirements, at mga mekanismo ng pananagutan bago tuluyang ipatupad ang proyekto.
Idinidiin din ng mga tumututol na habang dumarami ang mga komunidad sa Estados Unidos na kumukuwestiyon, humaharang, o tumututol sa pagtatayo ng malalaking AI data centers at iba pang proyektong may mataas na konsumo sa tubig at kuryente, hindi dapat maging alternatibong lokasyon ang Pilipinas para sa mga industriyang nahaharap sa lumalakas na oposisyon sa ibang bansa. Ayon sa kanila, hindi dapat isakripisyo ng bansa ang mga pinagkukunan ng tubig, lupang agrikultural, at kalikasan kapalit ng pamumuhunan na maaari umanong magdulot ng pangmatagalang pinsala sa mga susunod na henerasyon.
Bilang tugon sa mga pangamba, sinabi ng Malacañang na ipatutupad ang Pax Silica alinsunod sa mga umiiral na batas ng Pilipinas at sasailalim ito sa mahigpit na environmental regulations at iba pang kinakailangang permit.
Tiniyak din ng pamahalaan na hindi isusuko ng Pilipinas ang kontrol sa mga kritikal na likas na yaman o anumang bahagi ng teritoryo nito, at iginiit na layunin ng proyekto ang paglikha ng de-kalidad na trabaho, pagpapalakas ng industriya, at pag-akit ng mas maraming pamumuhunan sa bansa.
Habang isinusulong ng pamahalaan at ng Estados Unidos ang Pax Silica bilang susunod na hakbang sa industrial modernization ng Pilipinas, nananatiling sentro ng pampublikong debate ang balanse sa pagitan ng pag-unlad ng ekonomiya at ng pangangalaga sa kalikasan, suplay ng tubig, seguridad sa pagkain, at kapakanan ng mga lokal na komunidad.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
