Tiaong, Quezon. Arestado ang anim na suspek kabilang ang tatlong magkakapatid na lalaki na iniulat na nagtatrabaho bilang gun-for-hire at drug personalities sa bayang ito.
Madaling araw noong Sabado, Abril 9, 2022, noong sabay-sabay na ipatupad ang mga search warrant na inisyu ni Honorable Judge Agripino R. Bravo ng RTC Branch 55, Lucena City. Batay sa mga search warrant laban sa magkapatid, sila ay lumalabag sa RA 10591 o Comprehensive Firearms and Ammunition Act at napag alaman din na sila ay nagsasagawa ng gun-for-hire activities, partikular sa mga lalawigan ng Quezon, Batangas, at Cavite.
Lumalabas sa karagdagang impormasyon na sangkot din sila sa pagbebenta ng iligal na droga sa Quezon at Batangas provinces.
Kinilala ni PBGEN Antonio C. Yarra, Regional Director ng Police Regional Office 4A, ang magkapatid na sina Teodoro Aquino Satumba, 34 taong gulang, residente ng Brgy. Del Rosario, Tiaong, Quezon; Lorenzo Aquino Satumba, 43 taong gulang, magsasaka at residente ng Sitio Ibaba, Brgy. Cabay, Tiaong, Quezon; at Abelardo Aquino Satumba, 47 taong gulang, magsasaka at residente ng Brgy. Cabay, Tiaong, Quezon.
Inaresto si Teodoro matapos na makita sa kanyang tirahan ang isang hindi lisensyadong 9mm pistol na may magazine at anim na bala. Sa tirahan ni Lorenzo ay isang .45 caliber pistol (Armscor) na kargado ng magazine at siyam na mga bala ang nakuha samantalang sa tirahan ni Abelardo ay natagpuan ang isang .38 caliber revolver (Armscor) na may kargang apat na basyo ng bala at walang serial number; isang .30 caliber Carbine rifle na may lambanog at dalawang magazine; isang .45 caliber pistol (Colt) na may magazine at limang basyo ng bala, isang stabilizer, dalawang spring para sa .45 caliber, cleaning kit, at isang holster; isang fragmentation hand grenade; at dalawang sachet ng hinihinalang shabu.
Sa proseso ng paghahanap sa tirahan ni Abelardo, nakita ng mga tauhan na nakatalaga sa pag-secure sa perimeter ng bahay ang tatlong suspek malapit sa paligid habang nagtitimbang ng mga sachet ng hinihinalang shabu. Ang 19 na sachet ay may timbang na humigit-kumulang 95 gramo sa kabuuan at may street value na halos dalawang milyong piso. Kinilala ng pulisya ang tatlong drug suspect na sina Joy Mark M. Salumba (pamangkin ng magkapatid), Jordan E. Bañez, at Christian G. Comia.
Kakasuhan ang magkapatid ng paglabag sa RA 10591 kaugnay ng COMELEC Resolution No. 10728 at RA 9165. Bukod dito, si Abelardo at ang tatlong suspek na naaresto dahil sa pagkakaroon ng malaking halaga ng hinihinalang shabu ay mahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
Samantala, pinuri ni PBGen Yarra ang pinagsamang mga operatiba sa ilalim ng Regional Intelligence Division ng PRO 4A, na tinulungan ng mga tauhan ng Tiaong Municipal Police Station, Regional Mobile Force Battalion, Quezon Provincial Mobile Force Company, at isang team mula sa Armed Forces of the Philippines sa matagumpay na pagsasagawa ng sabay-sabay na pagsalakay.
“As the National and Local Elections nears, the entire force of PRO CALABARZON is intensifying its campaign against all forms of crimes, wanted persons, and loose firearms to make sure that the region is safe and secure,” ayon kay PBGen Yarra.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
