MAYNILA — Inaprubahan ng Land Transportation Franchising and Regulatory Board (LTFRB) ang pansamantalang pagtaas ng pasahe sa mga provincial public utility bus at naglabas ng updated fare guide upang matiyak ang maayos at pare-parehong pagpapatupad nito sa buong bansa.
Ayon sa LTFRB, ang bagong fare guide ay nakabatay sa provisional order na inilabas noong Marso 13, 2026, habang nagsimula namang ipatupad ang bagong pasahe noong Marso 14. Layunin ng hakbang na magkaroon ng malinaw at standard na singil sa lahat ng provincial bus operators at ruta sa Pilipinas.
Sa ilalim ng bagong gabay sa pasahe, may dagdag na ₱0.35 kada kilometro sa mga air-conditioned, super deluxe at deluxe na bus. Samantala, ang mga luxury buses ay may karagdagang ₱0.45 kada kilometro. Para naman sa mga ordinary provincial buses, may ₱1.00 na dagdag sa base fare at karagdagang ₱0.30 sa bawat susunod na kilometro.
Pinayuhan ng LTFRB ang mga bus operator na mahigpit na sundin ang updated fare guide at tiyaking nakapaskil sa loob ng kanilang mga sasakyan ang tamang singil sa pasahe upang malinaw itong makita ng mga pasahero.
Hinimok din ng ahensya ang mga commuter na suriin ang opisyal na fare guide at agad i-report sa LTFRB ang anumang kaso ng overcharging o iba pang paglabag ng mga operator.
Ayon pa sa LTFRB, ang fare adjustment ay bahagi ng pagsisikap na balansehin ang kapakanan ng mga pasahero at transport operators sa gitna ng patuloy na pagbabago sa kalagayan ng ekonomiya.
Ipinatupad ang pagtaas ng pasahe sa panahong nananatiling pabagu-bago ang presyo ng langis sa pandaigdigang merkado, na pinalalala ng tumitinding tensyon sa Middle East.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
