San Pablo City, Laguna. Inilunsad na ng ang Executive Order No. 25, S. 2023 na nagtatag ng Barangay Information Office (BIO) at Officer, ayon sa ulat ng San Pablo City Hall.
Noong Biyernes ng hapon, ika-2 ng Hunyo 2023, ginanap ang opisyal na paglulunsad sa Pamana Hall sa San Pablo City Hall Compound, kung saan nilagdaan ni Mayor Vicente Belen Amante ang nasabing Executive Order noong ika-31 ng Mayo 2023.
Ang nabanggit na EO-25 ay naglalayong magtakda at magbuo ng mga Barangay Office at Officer sa 80 barangay ng lungsod.
Dumalo sa simpleng programa ng paglulunsad sina kasalukuyang Vice Mayor Justin Colago, city councilor Carmela Asaña Acebedo at Chad Pavico, Executive Assistant to the City Mayor Tintin Picazo, Seven Lakes Press Corps Secretary General Ruben Taningco, mga opisyal ng barangay information office, kinatawan mula sa Philippine Information Agency, at iba pang mga kawani at opisyal ng lokal na pamahalaan ng San Pablo.
Ang City Information Office ng San Pablo, sa pamumuno ni City Information Officer Enrico Galicia, ang nanguna sa pagbuo ng BIO sa ilalim ng patnubay ni Mayor Amante kasama ang Sangguniang Panlungsod.
Magiging tulay ng komunikasyon ang Barangay Information Office sa pagitan ng pamahalaan at mamamayan gamit ang modern communications.
Sa pamamagitan ng bagong technology, ang BIO ay naglalayong magbigay ng mabilis, epektibo, at ligtas na komunikasyon sa mga mamamayan ng barangay. Ito ay naglalayong mapadali ang paghahatid ng impormasyon, mga serbisyo, at mga programa ng pamahalaan.
Ang digital technology tulad ng online platforms, social media, at iba pang mga digital na kasangkapan ay magiging mga instrumento ng Barangay Information Office upang maabot ang mas malawak na bilang ng tao sa komunidad.
Sa pamamagitan nito, magkakaroon ng mas malaking pagkakataon ang mga mamamayan na magbigay ng kanilang mga puna, katanungan, at mga hinaing sa pamahalaan.
Layunin ng BIO na magtatag ng isang sistemang transparent at accessible para sa lahat ng mga residente ng barangay. Sa pamamagitan ng digital na teknolohiya, mas madaling maipapabatid ang mga proyekto, anunsyo, at mga programa ng pamahalaan, na magbibigay-daan sa aktibong partisipasyon at pakikilahok ng mga mamamayan sa mga lokal na isyu at patakaran.
Sa pagsasanay at paggamit ng digital na teknolohiya, inaasahang mas maayos at moderno ang serbisyo ng BIO. Ang digital na platform ay magiging daan upang maipahayag ang mga tagumpay, mga pangangailangan ng komunidad, at maging sandigan sa pagbuo ng magandang ugnayan sa pagitan ng pamahalaan at mamamayan.
Ang BIO na gagamit ng digital communication technologies ay isang malaking hakbang tungo sa mas maunlad at konektadong komunidad. Ito ay magbibigay-daan sa mas mabilis, epektibo, at inklusibong komunikasyon, na naglalayong mapabuti ang pamamalakad ng barangay at lubos na mapaglingkuran ang mga mamamayan.
Sandy Belarmino
Si Sandy Belarmino ay 17 taon ng naglilingkod sa larangan ng pamamahayag. Naging broadcaster siya sa radyo at local TV. Media correspondent din sya at columnist sa iba’t ibang dyaryo ng lokal sa San Pablo City. Si Sandy ay kasalukuyang pangulo ng Seven Lakes Press Corps.
