MAYNILA. Pinag-aaralan ng Commission on Elections (Comelec) na tanging mga kasalukuyan o bagong kuhang larawan lamang ng isang kandidato ang pahihintulutan nilang gamitin sa campaign materials para sa 2025 National and Local Elections (NLE).
Ayon kay Comelec Chairman George Erwin Garcia, maaaring i-require nila ang mga kandidato na magsumite ng hanggang 10 bagong larawan, na kuha sa nakalipas na anim na buwan lamang, na gagamitin sa kanilang campaign streamers, posters, at social media posts. Paliwanag ni Garcia, ang paglilimita sa mga larawang gagamitin sa kampanya sa mga bagong kuhang larawan lamang ay makatutulong sa mga botante upang maging mas pamilyar sila sa mga kandidato.
“Ang mga botante ay dapat makita ang tunay na hitsura ng kanilang mga kandidato, hindi ang mga larawang matagal na o masyadong pinalamutian,” sabi ni Garcia. Sakaling maaprubahan ang naturang polisiya, maaaring maparusahan ang mga kandidato na gagamit ng ibang larawan bukod sa mga larawang isinumite.
Tiniyak naman ni Garcia na pahihintulutan din nila ang bahagyang enhancement o pagpapaganda ng larawan, gaya ng pag-aalis ng nunal o kulubot sa balat, ngunit hindi dapat mabago ang hitsura ng kandidato.
Ang bagong panukalang ito ay bahagi ng patuloy na pagsusumikap ng Comelec na gawing mas transparent at patas ang eleksyon, at upang matiyak na ang mga botante ay may tamang impormasyon tungkol sa kanilang mga pinipiling lider.
Sa likod ng direktibang ito, inaasahan na magdudulot ito ng positibong pagbabago sa paraan ng pangangampanya at magiging daan upang mas makilala ng publiko ang kanilang mga kandidato, ayon sa Comelec.
Paraluman P. Funtanilla
Paraluman P. Funtanilla is Tutubi News Magazine's Marketing Specialist and is a Contributing Editor. She finished her degree in Communication Arts in De La Salle Lipa. She has worked as a Digital Marketer for start-up businesses and small business spaces for the past two years. She has earned certificates from Coursera on Brand Management: Aligning Business Brand and Behavior and Viral Marketing and How to Craft Contagious Content. She also worked with Asia Express Romania TV Show.
