MAYNILA. Sinabi ni Agriculture Secretary Francisco Tiu Laurel, Jr. na hindi kinakailangan ang deklarasyon ng national state of calamity sa kabila ng patuloy na pagkalat ng African Swine Fever (ASF) sa ilang bahagi ng bansa. Sa isang pahayag, siniguro ni Laurel na walang kakapusan ng suplay ng baboy sa mga susunod na buwan.
Ayon kay Laurel, ang mga lockdown na nauugnay sa ASF ay nakabatay sa antas ng sakahan. “Wala naman akong nakikitang perceived shortage. Kasi ang mangyayari ngayon, yung mga let’s say katulad sa mga munisipyong merong ASF, hindi naman total na ila-lockdown at walang lalabas,” ani Laurel sa mga mamamahayag sa sidelines ng pagdinig ng House Committee on Appropriations sa P200.2-bilyong panukalang budget ng Department of Agriculture para sa 2025.
Sinabi rin ni Laurel na hindi ipatutupad ng DA ang mahigpit na lockdown na ipinataw noong 2019 nang kumalat ang ASF sa ilang probinsya. “Puwede naman ‘yan lutuin. Ibang bansa nga, meron silang processing plants for infected animals para lutuin at ilata kasi safe naman,” dagdag pa niya.
Para sa mga apektadong hog raiser, magbibigay ang DA ng bayad-pinsala. Ang compensation ay magiging P4,000 para sa bawat culled na baboy at biik, P8,000 para sa mga katamtamang laki ng baboy, at P12,000 para sa malalaking baboy. Malaki itong pagtaas mula sa dating P5,000 na ibinibigay. “’Yun nga ang reason kung bakit tinaas namin at ni-nationalize namin ang indemnification, para talagang katayin na nila, i-surrender nila,” paliwanag ni Laurel.
Ayon kay Laurel, hindi maaapektuhan ang supply ng baboy dahil nagpapatupad din ang DA ng hog repopulation program at patuloy ang importasyon. “Hindi rin naman dapat maapektuhan ng ASF ang presyo ng baboy,” dagdag pa niya. Sinabi rin niya na walang epekto sa industriya ng processed meat ang ASF.
Sa tanong ukol sa posibilidad ng national state of calamity, sinabi ni Laurel, “No, no need. Ito ay naisalokal. Medyo kumakalat pero hindi kasing bilis.” Idinagdag niya, “And mas aware na kasi ang mga tao ngayon kasi nangyari na dati. Marami rin naman mga facilities may biosecurity. So hindi naman ibig sabihin ang buong munisipyo affected na. It’s still farm-based pa rin.”
Panghuli, inihayag ni Laurel na 10,000 doses ng ASF vaccine ang nakatakdang dumating sa bansa sa susunod na linggo at ipapamahagi ito sa mga hog raisers nang libre.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
