MAYNILA. Dalawang bagong kaso ng mpox ang natukoy sa Pilipinas, dahilan upang umabot na sa 12 ang kabuuang bilang ng mga kaso, ayon sa Department of Health (DOH) noong Lunes, Agosto 26.
Ang ika-11 kaso ay isang 37-anyos na lalaki mula sa National Capital Region (NCR) na nakaramdam ng mga sintomas simula noong Agosto 20. Kabilang sa mga sintomas ang mga pantal sa mukha, braso, binti, thorax, palad, at talampakan. Batay sa inisyal na imbestigasyon, wala siyang alam na direktang pagkakalantad sa sinumang may parehong sintomas, ngunit inamin niya na nagkaroon siya ng “intimate at skin-to-skin contact sa loob ng 21 araw bago nagsimula ang kanyang mga sintomas.”
Na-admit ang pasyente sa isang ospital ng gobyerno noong Agosto 22, kung saan kinuha ang sample ng balat na sinuri sa DOH Research Institute for Tropical Medicine (RITM). Ayon sa DOH, patuloy pa ring naka-confine ang pasyente.
Samantala, ang ika-12 kaso ay isang 32-anyos na lalaki mula rin sa NCR na nagsimulang makaranas ng sintomas noong Agosto 14. Nakita niya ang mga sugat sa balat, partikular na ang malinaw at puno ng likidong mga vesicle sa kanyang singit. Makalipas ang ilang araw, nagkaroon siya ng lagnat. Inamin din ng pasyente na nagkaroon siya ng close, intimate, at skin-to-skin contact sa isang sexual partner.
Una nang nagpakonsulta ang pasyente sa isang outpatient clinic, kung saan inakalang siya ay may bacterial infection. Gayunpaman, makalipas ang ilang araw, nagkaroon siya ng mga sugat na parang tagihawat sa mukha, noo, at anit. Pinayuhan siyang magpakonsulta sa isang ospital ng DOH, kung saan kinuha ang isang sample ng balat noong Agosto 23. Siya ngayon ay nasa home isolation.
Ayon sa DOH, parehong nahawahan ng MPXV Clade II ang pinakabagong mga pasyente, isang mas banayad na anyo ng mpox virus. Sa kabuuang 12 kaso, siyam na ang gumaling habang ang natitirang tatlo ay mga aktibong kaso na naghihintay ng pagresolba ng mga sintomas.
Samantala, hindi kinumpirma o itinanggi ng DOH ang mga ulat ng hinihinalang kaso ng mpox sa Northern Samar. Pinaalalahanan din ng ahensya na maraming sakit sa balat tulad ng bulutong-tubig, shingles, o herpes na maaaring magmukhang mpox.
Sinabi rin ni DOH Assistant Secretary Albert Domingo na wala pang natutukoy na epidemiologic linkage ang dalawang bagong kaso sa ika-10 kaso na natukoy ngayong buwan. Ang ika-10 kaso ay isang 33-anyos na lalaking Filipino na walang kasaysayan ng paglalakbay sa labas ng bansa, ngunit nagkaroon ng close at intimate contact tatlong linggo bago nagsimula ang sintomas.
Pinaaalalahanan ng DOH ang publiko na ang mpox virus ay naipapasa sa pamamagitan ng close at intimate contact sa ibang tao na infected o sa kontaminadong materyal tulad ng damit o utensils. Bilang pag-iingat, ipinapayo ng DOH na gumamit ng sabon at tubig upang mapatay ang virus at magsuot ng gloves kapag naghuhugas ng kontaminadong gamit o materyal.
Inihayag din ng DOH nitong Huwebes na nakipag-ugnayan na ito sa World Health Organization (WHO) upang makakuha ng access sa mga bakuna sa bulutong na maaaring makatulong laban sa mpox virus. Sinabi rin ni Health Secretary Ted Herbosa na ang Pilipinas ay nasa proseso ng pag-secure ng 2,000 doses ng mpox vaccines na iniaalok sa bansa.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
