Balak ng Department of Human Settlements and Urban Development (DHSUD) na magtatag ng evacuation center belt sa Batangas upang mapahusay ang kahandaan ng lalawigan laban sa mga darating na pagsabog ng Bulkang Taal at iba pang kalamidad.
Sinabi ni Secretary Eduardo del Rosario na titiyakin ng DHSUD na magiging matatag at komportable ang mga evacuation center para sa mga residente na naghahanap ng masisilungan kapag may lindol, bagyo, malakas na pagbaha, at sa tuwing nagpapakita ng kaguluhan ang Taal.
“We hope to put up another evacuation center in Nasugbu,” ayon kay del Rosario sa isang statement kahapon.
Noong Lunes, tatlong evacuation centers ang pinasinayaan, na estratehikong kinalalagyan sa labas ng 14-kilometrong danger zone, sa Barangay Calayaan, Sta. Teresita; Barangay San Juan, Alitagtag; at Barangay Dos, Mataasnakahoy.
Natapos na ng lokal na pamahalaan, DHSUD, at Department of Public Works and Highways ang pagtatayo ng mga evacuation sites sa mga bayan ng Tanauan, San Pascual, San Juan, Santo Tomas, Lobo, at Bauan matapos sumabog ang Taal noong Enero 2020.
Kasalukuyan din itinatayo ang mga proyekto ng evacuation center na pinamumunuan ng DPWH sa Barangay Sta. Rita Karsada, Batangas City at sa bayan ng Tuy.
Ang Bulkang Taal ay nasa Alert Level 3 (magmatic unrest) mula noong Marso 26, bagama’t walang natukoy na volcanic earthquake sa nakalipas na 24 na oras kahapon ng umaga, ayon sa Philippine Institute of Volcanology and Seismology.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
