MAYNILA. Hindi na kinakailangan ang muling pagpapatupad ng mandatory na pagsusuot ng face masks sa kabila ng paglitaw ng bagong variant ng COVID-19, ayon sa Department of Health (DOH) nitong Miyerkules. Ang variant na ito, na tinatawag na XEC, ay inaasahang magiging dominanteng variant sa buong mundo, ngunit hindi ito nagdudulot ng labis na pangamba sa mga awtoridad.
Ipinaliwanag ni DOH spokesperson Albert Domingo na ang XEC ay isang offshoot ng JN.1 variant na kilala dahil sa mabilis na pagkalat. Ayon kay Domingo, “Bagamat lumabas ang bagong variant na iyan, ang dapat nating tandaan, meron talagang laging lalabas na bago. Sa XEC, may bago siyang mutation, ‘yun siguro ang ikinababahala na mukhang magaling siyang kumapit ulit sa mga tao pero hindi pa nakikita kung meron siyang datos, kung malala o hindi.”
Bagama’t wala pang naitatala na kaso ng XEC sa Pilipinas mula Setyembre 1 hanggang 14, posible umanong nakapasok na ang variant sa bansa. Ang XEC ay tinukoy bilang isang “recombinant na variant,” na resulta ng kombinasyon ng KS.1.1 at KP.3.3, mga variant na parehong nag-evolve mula sa JN.1.
Natuklasan ang XEC noong Agosto sa Germany, at mayroon nang 600 na kaso ng variant na ito sa 27 bansa sa Europa, North America, at Asya. Gayunpaman, ayon sa DOH, hindi dapat ikabahala ang pagkalat ng XEC dahil sa Germany, walang nakitang pagtaas ng malubhang kaso ng COVID-19 na dulot nito.
Samantala, ang naitalang kaso ng KP.2 at KP.3 infections sa bansa ay patuloy na bumababa, mula sa dating 400-500 kada araw, ngayon ay nasa 80 na lamang bawat araw. Sinabi rin ni Domingo na ang pagtaas ng mga flu-like illnesses ay maaaring dulot ng pagbabago ng panahon at hindi direktang nauugnay sa bagong variant ng COVID-19.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
