MAYNILA. Nangako ang Philippine Embassy at mga consuls general sa Estados Unidos na ipagpapatuloy ang pagtulong sa mga Filipino, anuman ang kanilang immigration status, sa gitna ng inaasahang pagbabago sa immigration policy sa ilalim ng administrasyon ni US President-elect Donald Trump.
Sa isang pahayag, sinabi ni Philippine Ambassador to the US Jose Manuel Romualdez at ng mga konsulado na magpapatuloy sila sa pagbibigay ng consular services para matiyak ang kaligtasan at kapakanan ng mga Filipino sa Amerika.
“The Heads of Posts understand the uncertainty felt by certain segments of the Filipino community in the United States following recent pronouncements by the incoming administration,” ayon sa kalatas ng embahada.
Nagpulong ang mga opisyal noong Disyembre 10 at 11 upang talakayin ang epekto ng mga patakaran ng bagong administrasyong Trump, partikular na sa immigration policy nito. Ayon kay Trump, ipapatupad niya ang malawakang deportation ng mga ilegal na imigrante at ihihinto ang “birthright citizenship,” o ang awtomatikong pagiging US citizen ng mga sanggol na isinilang sa Amerika kahit hindi US citizen ang kanilang mga magulang.
Sa panayam sa Meet the Press with Kristen Welker ng NBC News noong Linggo, sinabi ni Trump: “I think you have to do it. It’s a very tough thing to do. You know, you have rules, regulations, laws.”
Gayunpaman, binigyang-diin din ni Trump na bukas ang kanyang administrasyon sa pagbuo ng mga kasunduan upang protektahan ang mga tinatawag na “dreamer” immigrants—mga ilegal na dinala sa US noong bata pa sila.
Ayon kay Ambassador Romualdez, maraming Filipino sa Amerika ang nangangamba sa posibilidad ng mass deportation, lalo’t nasa 11 milyon ang tinatayang ilegal na imigrante sa bansa ayon sa US Department of Homeland Security. “Maraming Filipino ang nag-aalala dahil inaasahan nilang tutuparin ni Trump ang kanyang campaign promise na maglulunsad ng malawakang deportation,” ani Romualdez.
Dagdag pa rito, tiniyak ng Philippine Embassy ang kanilang “unified, coordinated, at effective response” upang protektahan ang mga Pinoy sa US, habang iginagalang ang mga batas ng host country.
Ang nasabing commitment ay mahalaga sa harap ng nagbabagong tanawin sa immigration policy sa Amerika, na posibleng makaapekto sa milyon-milyong Filipino na naninirahan doon.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
