MAYNILA. Nilinaw ni Dr. Rontgene Solante, isang kilalang infectious disease expert, na walang direktang kaugnayan ang mpox (dating tinawag na monkeypox) sa human immunodeficiency virus (HIV). Bagaman noong 2022 ay napansin na karamihan sa mga nahawahan ng mpox ay may HIV, ipinaliwanag ni Dr. Solante na magkaibang uri ng virus ang dalawang sakit na ito.
Ayon kay Dr. Solante, ang HIV ay isang progresibong impeksiyon na unti-unting sinisira ang immune system ng isang tao, samantalang ang mpox ay isang uri ng virus na maaaring maipasa sa pamamagitan ng close at intimate na skin-to-skin contact. Bagamat may mga ulat na nagpapakita na ang ilang kaso ng mpox ay nakuha sa pakikipagtalik, binigyang-diin ni Solante na ang HIV at mpox ay hindi magkaugnay.
Ayon sa Department of Health (DOH), ang mpox ay maaaring maipasa sa pamamagitan ng pakikipagtalik, at kinumpirma rin na ang ilan sa mga aktibong kaso ng mpox sa bansa ngayon ay nagkaroon ng sexual contact bago lumabas ang mga sintomas ng sakit.
Noong Linggo, kinumpirma ng DOH na walo na ang aktibong kaso ng mpox sa Pilipinas matapos makapagtala ng tatlong bagong kaso. Dalawa sa mga bagong kaso ay mula sa Metro Manila, at ang isa ay mula sa Calabarzon.
Ang tatlong bagong kaso ay nagpakita ng mas mild na sintomas mula sa MPXV clade II. Ayon sa DOH, ang mga kaso 15 at 16 ay nagkaroon ng anonymous sexual encounters sa higit sa isang partner, habang ang kaso 17 naman ay nagkaroon ng skin-to-skin contact sa isang tao na mayroong skin symptoms.
Ayon sa DOH, “The total case count is now 17 since July 2022. Nine cases have long recovered since 2023. Eight are active cases waiting for symptoms to resolve.”
Ang DOH ay patuloy na nagsasagawa ng mga hakbang upang mapigilan ang pagkalat ng mpox sa bansa at hinihikayat ang publiko na maging maingat at iwasan ang mga risk behaviors na maaaring magdulot ng impeksiyon.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
