Iniluklok ni Pangulong Ferdinand “Bongbong” Marcos Jr. si Gilbert Teodoro Jr. bilang kalihim ng Department of National Defense (DND) at si Dr. Teodoro Herbosa bilang kalihim ng Department of Health (DOH).
Ayon sa Presidential Communications Office, ang mga appointment ay inihayag matapos ang magkahiwalay na pagpupulong ni Marcos kay Teodoro at Defense Senior Undersecretary Carlito Galvez, at kay Herbosa at Health Undersecretary Ma. Rosario Vergeire nitong Lunes ng hapon.
Ang mga paghirang na ito ay ibinunyag matapos ang pahayag ni Marcos noong unang bahagi ng Mayo na magkakaroon ng reorganisasyon sa kanyang gabinete dahil natapos na ang appointment ban para sa mga natalong kandidato noong Mayo 9, 2023.
Si Teodoro ay dating kalihim ng DND sa ilalim ng administrasyon ni Gloria Macapagal-Arroyo mula Agosto 2007 hanggang Nobyembre 2009. Siya rin ang pinakabatang naitalaga sa posisyong ito sa edad na 43.
Matapos ang ilang taon ng pahinga mula sa mata ng publiko, tumakbo siya bilang senador sa 2022 Elections. Tatlong termino rin siyang nagsilbi bilang miyembro ng House of Representatives, kung saan kinatawan niya ang unang distrito ng Tarlac.
Si Teodoro ay nanguna sa Bar noong 1989 at nagtapos sa University of the Philippines College of Law. Mayroon siyang bachelor’s degree sa Commerce, Major in Financial Institutions mula sa De La Salle University, at Master’s degree sa Law mula sa Harvard University.
Samantala, si Herbosa ay nagsilbi bilang under secretary ng DOH mula 2010 hanggang 2015 sa ilalim ng administrasyon ni dating Pangulong Noynoy Aquino. Naging Regional Director rin siya ng DOH-National Capital Regional Office. Siya rin ang Executive Vice President ng University of the Philippines System mula 2017 hanggang 2021.
Sa panahon ng pandemya ng COVID-19, nagsilbi si Herbosa bilang Special Adviser sa National Task Force Against Covid-19.
Bilang paunang reaksyon sa paghirang ng kalihim ng kalusugan sa gitna ng pandaigdigang pandemya, nauna nang binatikos si Marcos dahil sa kawalan ng agarang aksyon sa pagtatalaga ng isang health secretary.
Ang DND at DOH ay dating pinamunuan ng mga acting secretaries na sina Galvez mula Enero 2023 at Vergeire mula Hulyo 2022.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
