Hinihiling ni Vice President at Department of Education (DepEd) Secretary Sara Duterte sa Commission on Elections (Comelec) na sagutin ang mga gastusin ng mga pampublikong paaralan na ginagamit na mga sentro ng pagboto.
Ipinarating niya ang isyu na ito sa Comelec en banc noong Lunes, kung saan tinukoy niya ang pasanin ng mga pampublikong paaralan na naglalaan ng pondo para sa kuryente at pag-aayos ng mga pinsala tuwing eleksyon.
“Hindi pa namin alam kung paano namin matutupad ang pagiging libre ng paggamit ng tubig at kuryente sa aming mga paaralan, at yung mga repairs ng mga nasirang gamit kapag tapos na ang eleksyon,” sabi ni Duterte.
“Ito po ay chinacharge sa MOOE (maintenance and other operating expenses) ng paaralan na hindi naman parte ng aming mandato,” dagdag pa niya.
Sinabi ng kalihim ng DepEd na ang nabanggit na alalahanin ay walang iniwan sa mga pagkakataon na ginagamit ang mga paaralan bilang mga evacuation center.
Ginagamit ng Comelec ang mga pampublikong paaralan sa buong bansa tuwing eleksyon, partikular na ang mga silid-aralan bilang mga presinto ng botohan.
Sinabi ni Comelec Chairman George Garcia na siya’y nagulat sa mga pahayag ni Duterte ngunit sumang-ayon na hindi dapat pasanin ng DepEd ang mga gastusin kaugnay ng halalan.
“Siyempre ‘yun ay hindi naman activity ng DepEd. Nauunawaan ko siya doon. Activity ‘yun ng Commission, activity ‘yun patungkol sa eleksyon, at kaya’t tama na isama ito sa budget para sa pagpapakilos ng eleksyon,” aniya.
Sinabi ni Garcia na ipararating ng Comelec ang alalahanin sa Department of Budget and Management at pag-aaralan ang mga pagbabago sa Omnibus Election Code.
“Ang solusyon po diyan ay amendment sa provision ng Omnibus Election Code,” sabi ni Garcia. “Kung doon pu-pwedeng maisama na mismo ‘yung item na ‘yun, automatically may appropriation para sa bagay na ‘yun,” dagdag niya.
Paliwanag din ni Garcia na ang budget na ibinibigay sa kanila ay sakop lamang ang honorarium ng mga guro at ang pagbili ng mga ballot box at balota.
Gayunman, sinabi ng poll chief na hindi agad ito magiging epektibo sa oras para sa Barangay at Sangguniang Kabataan Elections sa Oktubre 30.
Sinabi naman ni Michael Poa, spokesperson ng DepEd, na inaantay nila ang tantiya ng mga pinsala mula sa mga nakaraang eleksyon bago nila masuri kung gaano kalaking karagdagang pondo ang ibababa para sa kanilang MOOE.
Idinagdag pa ni Poa na ang koordinasyon ng gastusin para sa mga evacuation center ay kasalukuyan nang isinasagawa sa Department of the Interior and Local Government.
Hiniling rin ng education secretary na tiyakin ng poll body ang maagang pag-release ng mga pondo upang mapanatili ang integridad ng kanilang mga paaralan at mapanatiling maginhawa para sa kanilang mga mag-aaral.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
