Itinala ng Department of Foreign Affairs (DFA) ang pang-apat na Pinoy na nasawi sa patuloy na alitan sa pagitan ng Israel at militanteng Hamas. Sa isang pahayag na ipinaskil sa kanyang X account, ipinaabot ni DFA Secretary Enrique Manalo ang kanyang kalungkutan habang iniuulat sa publiko ang pinakabagong pagkamatay.
Hindi ibinunyag ni Kalihim Manalo ang pagkakakilanlan ng biktima alinsunod sa kahilingan ng pamilya. Gayunpaman, itiniyak niya sa pamilya ang tulong mula sa pamahalaan sa gitna ng kanilang pagdadalamhati.
Sinabi naman ni DFA Undersecretary Eduardo de Vega na ang ika-apat na biktima ay isang babae na caregiver sa isang komunidad sa south Israel, isang lugar na kabilang sa mga inatake ng militanteng Hamas. Isa siya sa tatlong Pilipino na iniulat na nawawala sa Israel. Hindi pa tiyak kung siya ay binihag at pinatay ng grupong militanteng Hamas.
Kinumpirma rin ni De Vega na ang labi ng isa sa apat na namatay na Pinoy ay iuuwi na sa Pilipinas ng kanyang asawa ngayong Nobyembre. Samantala, ang dalawa pang labi ay inaasahang maiuuwi sa mga susunod na linggo.
Sa ngayon, wala pang impormasyon tungkol sa dalawang nawawalang Pinoy. Isa sa kanila ay may hawak na Israeli passport at naturalized citizen doon, kaya’t ito ay maaaring paliwanag kung bakit walang detalyadong impormasyon mula sa pamahalaan ng Israel.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
