Calamba City. Laguna – Arestado ang isang opisyal ng Tau Gamma Fraternity at sumuko ang isa pa hinggil sapagkamatay ng 18-anyos na estudyanteng si Reymarc Rabutazo habang sumasailalim sa hazing sa Kalayaan, Laguna, noong Linggo.
Kinilala ni Lt. Erico Bestid, hepe ng Municipal police, ang dalawang suspek na sina Venzon Benedict Lacaocao, alyas Vez 19, waiter at Reyvince Espaldon, 19, alyas Binsot, at first year Criminology student.
Sinabi ni Bestid na si Lacaocao ay boluntaryong isinuko sa mga awtoridad ng kanyang nakatatandang kapatid na si Veelly Jhames Cabanmalan matapos ang insidente habang si Espaldon ay naaresto sa isang follow-up operation sa Barangay Longos, Kalayaan Laguna.
Inihanda na kahapon ang kasong homicide at Anti-Hazing Act of 2018 para sa inquest proceeding laban sa mga suspek.
Kabilang sa mga criminal sheet ay ang mga kinilalang sina Kevin Perez, Kirby Galero, Paulo Lacaocao, Leo Sandro Duco, alyas Papo, Wilson Maestrado, Johndel Ponce, at Kris Jairo Cabiscueles na nananatiling at large at tinutugis ngayon ng tracking operatives team.
Idineklarang dead on arrival si Rabutazo sa General Cailles Hospital sa kalapit na bayan ng Pakil, kung saan siya isinugod matapos mabalitaan na malunod sa ilog.
Ang pamilya ni Rabutazo sa pangunguna ng kanyang lola ay nagsumbong sa Kalayaan police noong Linggo ng hapon.
Lumabas sa imbestigasyon na nagtamo ng matinding trauma sa katawan ang biktima na pinaniniwalaang dulot ng mga suntok sa habang isinasagawa ang fraternity rites.
Ang hazing ay isinagawa umano ng mga miyembro ng Tau Gamma Fraternity sa isang maburol na bahagi ng Twin Falls sa Barangay San Juan.
Ilang miyembro ng fraternity ang nagpahayag ng kanilang intensyon na makipagtulungan sa imbestigasyon, ayon sa report na isinumite sa Camp Vicente Lim.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
