Iniutos ng Philippine National Police (PNP) sa mga police commander sa buong bansa ang madalas na gun safety training para sa mga tauhan at paalalahanan silang mag-ingat sa paghawak ng sarili nilang mga baril sa lahat ng oras.
Ipinalabas ni PNP chief Gen. Rodolfo Azurin Jr. ang kautusan matapos aksidenteng magpaputok ng kanyang service firearm ang isang pulis sa San Pablo City, Laguna noong Nobyembre 24, na ikinasawi ng kapwa pulis.
Kinilala ang biktima na si Cpl. Fhrank Alden dela Cruz, habang ang suspek ay si Cpl. George Mervin Duran, kapwa nakatalaga sa Special Weapons and Tactics (SWAT) ng San Pablo City police station.
Nasa paligid ng Barangay 1-B hall sa San Pablo City sina Duran, Dela Cruz at kanilang mga kapwa pulis na naglilinis ng kanilang mga baril bilang paghahanda sa inspeksyon ng mangyari ang insidente.
Nilapitan si Duran ng isang kasamahan na nagsabi sa kanya na maaaring napalitan ang kanilang mga baril.
Agad na sinuri ni Duran ang kanyang 9mm pistol at sinubukang linisin ang silid ng mga bala ng kanyang baril.
Gayunman, aksidenteng pumutok ang baril ni Duran at tumama kay Dela Cruz, na idineklarang dead on arrival sa Community General Hospital ng San Pablo City matapos bawian ng buhay dahil sa tama ng bala sa kanang dibdib.
Sinabi ni PNP public information office chief Col. Redrico Maranan na dapat pamilyar ang bawat pulis sa mga panuntunan sa kaligtasan ng baril upang maiwasan ang mga nakamamatay na aksidente tulad nito.
“Pagkarating ng report sa opisina ng ating chief PNP na si Gen. Rodolfo Azurin Jr, nag-issue agad siya ng direktiba, which is actually reiteration, sa ating mga ground commanders. Iyon ang dapat na priority, ito ay dapat isagawa linggo-linggo at tingnan kung mayroon tayong mga pagkukulang,” ayon sa kanya.
Sinabi rin ni Maranan na kailangan ng mga pulis ang familiarization para mapanatili ang kasanayan sa baril.
“Maaaring makalimutan ito ng isang tao (mga kasanayan) kung hindi nila ito isinasagawa paminsan-minsan. Kung nakalimutan mo ang mga pangunahing panuntunan sa kaligtasan ng baril, mapanganib iyon. Baka mauwi sa pagkawala ng buhay, gaya ng nangyari sa San Pablo,” ayon kay Maranan.
Sa press briefing sa Camp Crame, sinabi ni Lt. Gen. Rhodel Sermonia, PNP officer in charge at deputy chief for administration, na mahaharap si Duran sa kasong kriminal at administratibo kaugnay ng insidente habang nakatanggap na ng tulong mula sa PNP ang pamilya ng biktima.
Sinabi ni Sermonia na nagsasagawa ang PNP ng fact-finding investigation sa insidente at patuloy ang pagsasanay sa paghawak ng baril upang maiwasan ang katulad na insidente sa hinaharap.
“We keep reminding our people to be cautious and at the same time be very careful in handling our own firearms and we have been doing that (training) continuously. We have to keep reminding them, especially with the incident that happened like that,” dagdag niya.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
