Makulimlim na papawirin at inaasahan ang pag-ulan sa kalakhang bahagi ng bansa ngayong araw ng Sabado dahil sa low-pressure area (LPA) at Northeast Monsoon o “amihan.”
Sa kanilang 4 a.m. weather bulletin, sinabi ng Philippine Atmospheric, Geophysical and Astronomical Services Administration (PAGASA) na huling tinantya na ang LPA ay nasa baybayin ng Lanuza, Surigao del Sur.
Magiging maulap, na may kalat-kalat na pag-ulan at pagkidlat-pagkulog, sa Calabarzon, Mimaropa, at nalalabing bahagi ng Visayas at Mindanao dahil sa LPA.
Magdadala din ito ng maulap na kalangitan na may kalat-kalat hanggang sa malawak na pag-ulan at pagkidlat-pagkulog sa Rehiyon ng Bicol, Silangang Visayas, Dinagat Islands, at Surigao del Norte.
Sa kabilang banda, ang “amihan” ay magdadala ng maulap na papawirin na may mga pag-ulan sa Metro Manila, Aurora, Nueva Ecija, at Bulacan.
Ang nalalabing bahagi ng Luzon ay makakaranas ng bahagyang maulap hanggang sa maulap na papawirin na may mahinang pag-ulan na dala ng “amihan.”
Ang hangin sa buong bansa ay magiging katamtaman hanggang sa malakas, mula sa timog-silangan hanggang hilagang-silangan sa Hilagang Luzon at hilagang-silangan hanggang hilagang-kanluran sa iba pang bahagi ng bansa.
Ang temperatura sa San Pablo City, Laguna ay 27°C hanggang 23°C, Metro Manila ay mula 22°C hanggang 29°C; Lungsod ng Laoag, 21°C hanggang 30°C; Lungsod ng Lipa, 23°C hanggang 29°C; Metro Cebu, 23°C hanggang 27°C; Cagayan de Oro City, 24°C hanggang 27°C; at Metro Davao, 24°C hanggang 29°C. (PNA)
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
