SAN PABLO CITY. Pinangunahan ni City Mayor Vic Amante ang unang pampublikong konsultasyon hinggil sa posibleng paglilipat ng mga tanggapan ng pamahalaang lungsod mula sa lumang City Hall compound sa Barangay VA patungo sa bagong City Government Compound sa Barangay San Jose.
Ginanap ang konsultasyon sa Convention Center, kung saan dumalo ang mayorya ng Sangguniang Panglungsod upang masaksihan at talakayin ang panukalang hakbang. Sa kanyang mensahe, ipinaliwanag ni Mayor Amante ang layunin ng inisyatiba at ang posibleng benepisyo nito sa epektibong paglilingkod sa mamamayan.
“Ang layunin natin ay mas mapahusay ang serbisyo-publiko at masiguro na ang mga tanggapan ng pamahalaan ay nasa isang mas maayos, moderno, at accessible na lokasyon para sa lahat,” ani Amante.
Tinalakay rin sa pagdinig ang mga hamon na maaaring kaharapin sa paglilipat, kabilang na ang gastos, legal na proseso, at epekto sa mga empleyado at residente. Nagkaroon ng bukas na forum kung saan maaaring magpahayag ng kanilang pananaw ang mga mamamayan.
Ang lumang gusali ng City Hall, na itinayo noong 1940, ay idinisenyo noong panahong kakaunti pa lamang ang mga sasakyan at ang pangunahing transportasyon ay kalesa at karitela. Dahil sa paglago ng lungsod, nagdudulot ito ng matinding pagsisikip ng trapiko sa paligid. Ang planong paglilipat ay bahagi ng inisyatiba upang maibsan ang problema sa daloy ng trapiko at mapabuti ang serbisyo ng pamahalaang lungsod.
Ang pampublikong konsultasyon ay isang mahalagang bahagi ng proseso ng desisyon ng lokal na pamahalaan, na nagbibigay-daan sa transparency at partisipasyon ng publiko.
Photo credits: Roy Tomandao
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
