MAYNILA — Lumalala ang kalagayan ng mental health sa Pilipinas, lalo na sa hanay ng mga kabataan, ayon sa pinakahuling Mental State of the World Report ng Washington-based think tank na Sapien Labs.
Batay sa ulat, bumaba ang Mental Health Quotient (MHQ) ng mga Pilipino sa 68.76 noong 2024 mula sa 78.44 noong 2023. Bagama’t mas mataas pa rin ito kumpara sa global average na 62.84, malinaw na indikasyon ito ng paglala ng kalagayan ng kalusugang pangkaisipan sa bansa.
Pinakamababa ang MHQ score ng mga nasa edad 18 hanggang 24, na nagtala lamang ng 24.9, habang ang mga nasa 25 hanggang 34 ay may 46.1 kapwa kabilang sa “enduring” category o antas ng matinding mental distress. Samantala, mas mataas ang score ng mga nakatatanda, partikular ang edad 65–74, na umabot sa 115.5 o nasa “succeeding” category.
Ayon sa mga eksperto, ilan sa mga dahilan ng paglala ng mental health status ng mga Pilipino ay ang kahirapan, kawalan ng trabaho, social media pressure, at ang matagal na epekto ng pandemya. Pinaniniwalaang mas sensitibo ang mga kabataan sa mga salik na ito, lalo na sa aspeto ng emotional stability at interpersonal relationships.
Bilang tugon, inilunsad ng Department of Health (DOH) at World Health Organization (WHO) ang Philippine Council for Mental Health Strategic Framework 2024–2028. Layunin nitong palawakin ang access sa mental health services, isama ito sa primary health care system, at sanayin maging ang mga non-health workers para sa maagang pagtukoy ng mga kaso at agarang intervention.
Sa kabila ng mga programang ito, nananatiling limitado ang access sa mental health care. May tinatayang 220 mental health facilities sa buong bansa, karamihan ay nakasentro sa Metro Manila, dahilan upang maraming nasa probinsya ang walang sapat na serbisyo o mental health professionals.
Naniniwala ang mga advocate na kailangan ng mas agresibong kampanya laban sa stigma, dagdag na pondo para sa mental health programs, at mas malawak na koordinasyon sa mga paaralan, LGU, at pribadong sektor.
“Hindi lamang personal na usapin ang mental health,” ayon sa mga eksperto. “Ito ay pambansang isyu na may epekto sa bawat pamilya, ekonomiya, at kinabukasan ng kabataan.”
Para sa mga nangangailangan ng tulong, maaaring makipag-ugnayan sa National Center for Mental Health Crisis Hotline sa 1553 (Luzon-wide landline) o 0966-351-4518 (Globe/TM) at 0908-639-2672 (Smart/Sun/TNT).
Paraluman P. Funtanilla
Paraluman P. Funtanilla is Tutubi News Magazine's Marketing Specialist and is a Contributing Editor. She finished her degree in Communication Arts in De La Salle Lipa. She has worked as a Digital Marketer for start-up businesses and small business spaces for the past two years. She has earned certificates from Coursera on Brand Management: Aligning Business Brand and Behavior and Viral Marketing and How to Craft Contagious Content. She also worked with Asia Express Romania TV Show.
- Paraluman P. Funtanilla
- Paraluman P. Funtanilla
- Paraluman P. Funtanilla
- Paraluman P. Funtanilla
