Nagsisimula nang magbago ang ihip ng hangin para sa mga celebrity-politician na hindi pinalad sa nakaraang halalan, at tila unti-unti na silang bumabalik sa mundo ng showbiz.
Matapos ang kanilang paglahok sa politika, marami sa mga kilalang personalidad ang ngayon ay abala na muli sa entertainment industry. Sa social media, makikita ang kanilang mga bagong pinagkakaabalahan at ang mga tanong ng kanilang mga tagahanga, kung babalik ba sila sa telebisyon at kung saang programa.
Isa sa mga napag-usapan kamakailan ay si Luis Manzano, na tinatanong ng kanyang mga followers kung alin sa mga dating game shows niya ang nais nilang balikan niya, Rainbow Rumble, Deal or No Deal, o Minute To Win It. Umabot na sa mahigit 1,700 ang comments sa post na ito, na patunay na sabik pa rin ang publiko sa kanyang pagbabalik-telebisyon.
Si Robi Domingo naman ay nagpakita ng interes sa pagbabalik ng “It’s Your Lucky Day,” ang pansamantalang ipinalit sa “It’s Showtime” noong ito’y masuspinde ng MTRCB. Ang kanyang asawa namang si Jessy Mendiola ay boto sa “Rainbow Rumble,” habang si Daniel Matsunaga ay pabor sa “Minute To Win It.” Si John Prats, sa kabilang banda, ay nais makita si Luis sa lahat ng nabanggit na game shows dahil aniya, mahusay naman talaga ito sa mga ganoong format.
Samantala, si Senador Bong Revilla ay mas pinipiling maglaan ng oras sa kanyang pamilya. Kani-kaniyang post siya sa social media ng bonding moments kasama ang kanyang mga apo, kabilang na ang anak nina Cong. Jolo Revilla at Angel, na si Lauren, at ang anak nina Gianna at Jed Patricio.
Tungkol naman sa showbiz comeback ni Senador Bong, wala pa siyang malinaw na sagot kung itutuloy ang season 4 ng kanyang action-comedy series na Walang Matigas na Pulis sa Matinik na Misis. May producer na nais gumawa ng pelikula kasama siya, ngunit naghihintay pa sila ng tamang panahon at availability ng senador. Target umano nila itong isali sa Metro Manila Film Festival, pero aminado ang aktor-politiko na may pag-aalinlangan pa siya.
Sa kabilang dako, mainit na pinag-uusapan ngayon ang kumakalat na pahayag umano ni Willie Revillame ukol sa kanyang karanasan sa pulitika. Ayon sa post na inilathala sa Facebook, nawalan umano ng gana si Willie sa pagtulong matapos ang kanyang pagkatalo sa eleksyon.
Ito ang sinasabing pahayag ni Willie:
“As of now, kung tatanungin n’yo ko, hindi ko alam kung kaya ko pa ituloy ang pagtulong sa mahihirap. Feeling ko kasi walang kuwenta lahat ng aking ginawa.”
Dagdag pa umano ng ilang vlogger, pansamantalang mananahimik si Willie. Gayunman, hindi pa tiyak kung totoo nga ang mga salitang ito o bahagi lamang ito ng isang deepfake video.
Sa gitna ng usapin, maraming netizens at tagapakinig ng mga radyo ang nagbigay ng reaksyon:
“Kung tutulong ka, hindi boto ang kapalit. Ang pagtulong ay iba sa paggawa ng batas.”
Habang patuloy ang pag-usad ng mga showbiz personalities sa kanilang bagong yugto, kapansin-pansin na tila natututo na ang publiko na paghiwalayin ang kasikatan sa serbisyo publiko.
Ang tanong: Ito na nga ba ang simula ng pagtatapos ng ‘celebrity era’ sa pulitika?
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
- Venus L Peñaflorhttps://tutubi.ph/author/venusp/
