STA. ROSA CITY, Laguna. Natukoy na ng mga tauhan ng Sta. Rosa Police Station ang apat na armadong lalaking nagpanggap na mga ahente ng Philippine Drug Enforcement Agency (PDEA) na nanloob sa bahay ng isang negosyante at tumangay ng ₱628,000 na cash at alahas sa lunsod na ito noong Sabado ng gabi.
Ayon kay PDEA-Calabarzon spokesman Mary Ann Mahilom-Lorenzo, lumabas sa imbestigasyon na hindi miyembro ng PDEA4A ang mga armadong lalaki. Sa kabila nito, tutulong ang ahensya sa imbestigasyon na gagawin ng kanilang Philippine National Police (PNP) counterpart sa insidente.
Aniya, maghahain ang ahensya ng kinakailangang reklamo para sa “Usurpation of Authority” dahil sa paggamit ng pangalan ng PDEA. Dagdag pa niya, ang mga suspek na iniulat na naaresto ng mga lokal na awtoridad ay hindi miyembro ng PDEA. Tumanggi naman ang opisyal na magbigay pa ng detalye kaugnay sa pagkakaresto ng mga suspek.
Ayon naman sa pulisya, isa sa apat na suspek ang naaresto ilang sandali matapos pasukin ng mga armadong lalaki ang bahay ng negosyanteng si Niño Marfil, alyas “Arni,” ng Barangay Sinalhan, Santa Rosa City. Natangayan ang negosyante ng ₱628,000, sari-saring alahas, at dalawang mobile phone noong Sabado ng gabi.
Kinilala ng mga imbestigador ang dalawa sa apat na armadong lalaki habang dalawa pa ang hindi pa nakikilala. Ang insidenteng ito ay nagdulot ng takot at pangamba sa mga residente ng Santa Rosa City, na ngayon ay umaasa sa mabilis na aksyon ng mga awtoridad upang mahuli ang natitira pang mga suspek.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
