STA. CRUZ, Laguna. Nagsampa ng reklamo ang isang kawani ng Local Government Unit ng Pangil, Laguna sa Regional Trial Court at Sangguniang Panlalawigan ng Laguna laban sa isang Municipal Councilor matapos itong magpaputok ng baril sa loob ng compound ng Pangil Central Elementary School at magmura habang siya ay lasing.
Ang suspect ay knilalang si Councilor Herbert Bautista (hindi artista) na napag alaman na nasa unang termino bilang konsehal ng Pangil, Laguna.
Ayon sa salaysay ni Dave Aderes, 30 anyos at kawani ng Department of Agriculture, nagtatanim siya ng kalamansi sa loob ng eskwelahan ng makarinig siya ng putok ng baril. Tiningnan umano niya ang pinanggalingan ng putok at doon niya nakita si Bautista na may hawak na baril.
Nang makita siya ng konsehal, dito na umano siya minura at sinigawan sa harap ng mga guro at estudyante.
Agad na nagsumbong sa himpilan ng pulisya si Anderes at mabilis na kinumpiska ang dala nitong baril na isang cal.45 pistol.
Sang-ayon sa pahayag ni Pangil Vice Mayor Divine Grace Estoveza, inamin ni Bautista sa kanyang tanggapan ang ginawang pagpapaputok nito ng baril at paninigaw kay Aderes.
Ayon pa sa mga pahayag ng ilang residente sa lugar, maraming beses ng nasangkot si Bautista sa gulo sa kanilang barangay at minsan na rin umanong ni-raid ng CIDG ang bahay nito dahil sa isyu ng pag-iingat ng mga matataas na kalibre ng baril.
Sinabi naman ni Police Major Clemente Garcia, hepe ng Pangil Municipal Police Station na nakasampa na sa husgado ang kasong alarm and scandal laban kay Bautista.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
