Nagpapaalala ang Philippine Atmospheric, Geophysical and Astronomical Services Administration (PAGASA) kagabi sa publiko na maghanda sa mga posibleng epekto ng binabantayang bagyong si Odette na inaasahang papasok sa Philippine Area of Responsibility mamayangg gabi.
Ayon sa PAGASA, inaasahang magla-landfall ang bagyong Odette sa bahagi ng Eastern Visayas o Caraga sa Huwebes nang hapon o gabi.
Maaaring umabot hanggang signal no. 3 ang Tropical Cyclone Wind Signal na itataas sa mga lugar na apektado ng bagyo.
Magdadala ito nang malalakas na hangin at pag ulan sa Visayas, malaking bahagi ng Mindanao, at ilang probinsya sa Southern Luzon.
Ayon sa PAGASA, posibleng itaas ang signal no. 1 sa bahagi ng Eastern Visayas at Mindanao mamayang hapon o gabi.
Pinag-iingat ang mga apektadong lugar sa banta ng pagbaha, pagguho ng lupa, at mga panganib na dulot ng malakas na hangin at bagyo.
Inaabisuhan din ang mga mangingisda at mga sasakyang pandagat na huwag nang pumalaot dahil sa mapanganib na kondisyon ng dagat.
Tuloy-tuloy naman ang pag antabay ng NDRRMC at Regional DRRMCs sa sitwasyon kaugnay ng bagyong Odette.
Sa isinagawang pagpupulong ngayong araw, tinalakay ang iba’t ibang paghahanda sa mga apektadong lugar upang masiguro ang kaligtasan ng mga residente at agarang mga aksyon sa epekto ng bagyo.
Patuloy na pag-iingat, pag-antabay sa ulat panahon at pagsunod sa mga abiso ng awtoridad ang paalala sa publiko.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
