Mahigpit na binabantayan ng National Disaster Risk Reduction and Management Council (NDRRMC) at ng mga katuwang nito sa mga local government unit sa Rehiyon ng Calabarzon ang kaguluhang sanhi ng pag aalburuto ng Bulkang Taal at inilikas ang mga residente dahil maaaring magkaroon ng mas malakas na pagsabog.
Kaninang umaga, itinaas ng Philippine Institute of Volcanology and Seismology (Phivolcs) ang status ng bulkan mula sa Alert Level 2 (increasing unrest) at sa Alert Level 3 (magmatic unrest) dahil sa magmatic intrusion sa main crater na maaaring magdulot ng mga susunod na pagsabog.
Hanggang alas-11 ng umaga kanina, mayroon nang 160 pamilya mula sa bayan ng Agoncillo, na binubuo ng 800 hanggang 900 indibidwal, at 81 pamilya o 222 indibidwal mula sa munisipalidad ng Laurel ang inilikas, ayon sa pahayag ng NDRRMC.
Ang mga ahensya ng gobyerno at mga unipormadong serbisyo ay nagpapatupad din ng mga aksyong pagtugon upang tulungan ang mga apektadong komunidad.
Ang mga karagdagang supply ng family food packs ay inihahanda ng pamahalaang panlalawigan at ng Department of Social Welfare and Development upang dagdagan ang mga aktibidad sa pagtulong ng mga apektadong local government units, gayundin ang mga sasakyan upang suportahan ang mga pagsisikap sa paglikas.
Pinapayuhan ang mga residente ng mga apektadong lugar na manatiling mapagbantay, gumawa ng mga hakbang sa pag-iingat, at sundin ang mga babala at payo ng mga awtoridad.
Ayon kay Phivolcs Volcano Monitoring and Eruption Prediction Division chief, Dr. Ma. Antonia Bornas, bandang alas-7 ng umaga, ang Taal Volcano main crater ay nakabuo ng panandaliang phreatomagmatic burst na sinundan ng halos tuloy-tuloy na aktibidad na phreatomagmatic na nagdulot ng mga plume na 1,500 metro, na sinamahan ng volcanic earthquake at infrasound signals.
Iniulat ni Office of Civil Defense Regional Director Maria Theresa Escolano na ang regional DRRMC ay nakikipag-ugnayan na sa mga alkalde ng mga apektadong lugar para sa mga update sa sitwasyon, mga aksyon sa pagtugon tulad ng paglikas, at pagpapalaki ng resources kung mananatili ang kaguluhan sa bulkan.
Tinukoy ng Phivolcs ang Barangay Bilibinwang at Banyaga sa Agoncillo at Boso-boso, Gulod, at ang silangang bahagi ng Barangay Bugaan East ng Laurel bilang mga high-risk areas.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
