NEW YORK CITY. Inaresto ang isang guro mula sa Pilipinas sa Raleigh-Durham International Airport sa North Carolina nitong nakaraang weekend dahil sa alegasyon ng child pornography.
Ang suspek na si Jestoni Jumaquio Pestaño, ay naghihintay sa kanyang flight patungong Japan noong Sabado nang mahuli siya ng mga ahente ng Homeland Security at airport police.
Dinala siya sa Halifax County Sheriff’s Office, kung saan iniharap sa kanya ang isang warrant para sa Felony Second Degree Sexual Exploitation of a Minor.
Kasalukuyang nakakulong si Pestaño sa Halifax County Detention Center nang walang inirekomendang piyansa dahil sa potential flight risk.
Noong Pebrero 15, 2024, nakatanggap ang mga imbestigador ng Criminal Investigations Division ng Halifax County Sheriff’s Office ng isang ulat hinggil sa child pornography na ipinadala sa Halifax County sa pamamagitan ng Instagram mula sa isa pang user sa Pilipinas.
Matapos matanggap ang impormasyon, agad na nagsagawa ng pagsisiyasat ang mga detectives at natukoy na ang media ay ipinadadala mula sa isang lokal na IP address. Sa kanilang pagsisiyasat, natukoy nila si Pestaño, isang guro sa Halifax County Early College, na siyang posibleng responsable sa pagpapadala ng mga nasabing images.
Nakakuha ng mga awtoridad ang mga multiple search warrant na isinilbi sa paaralan at tahanan ni Pestaño.
Samantala, patuloy pa rin ang imbestigasyon at maaaring magkaroon pa ng karagdagang kaso laban sa suspek.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
