MAYNILA. Nakatakdang baguhin ng Department of Agriculture (DA) ang 30-taong patakaran sa importasyon ng baboy na may mas mababang taripa, kasunod ng ulat na may mga importer umanong nagsasamantala sa umiiral na sistema.
Sa isang pahayag, sinabi ni Agriculture Secretary Francisco Tiu Laurel Jr. na iniutos na niya ang isang “total overhaul” ng minimum access volume (MAV) mechanism para sa baboy, isang sistema na binalangkas pa noong 1996.
Ang MAV ay tumutukoy sa itinalagang dami ng imported na produktong agrikultural na pinapayagang pumasok sa bansa sa mas mababang taripa. Sa kasalukuyang sistema, ang imported pork sa ilalim ng MAV quota ay may taripa na 15%, mas mababa kumpara sa regular na rate na 25%.
“We are reformulating the rules for MAV. The DA’s Policy and Planning Office is already on the job and they have to have an output by October this year,” ani Tiu Laurel.
“Our MAV rules were written in 1996 and when I read it, I found a lot of room for improvement. So, we have to revise the MAV,” dagdag pa niya.
Batay sa kasalukuyang alokasyon, may 55,000 metric tons (MT) na MAV para sa imported pork—30,000 MT rito ay nakalaan para sa meat processors upang matiyak ang mababang presyo ng processed meat.
Sa pagsusuri ng MAV scheme, natuklasan ni Tiu Laurel na mula sa 130 quota holders, 47 account ang kumokontrol sa 80% ng kabuuang alokasyon. Dagdag pa rito, 22 sa 47 quota holders ay humahawak ng 70% ng kabuuang dami.
“In reality, 22 MAV quota holders account for 55% of the total volume,” aniya.
“Worse… many of those MAV quota are often reused, inflating total import volume,” dagdag pa niya. “The sad part about this is that consumers don’t benefit the reduced tariff.”
Upang matugunan ito, sinabi ni Tiu Laurel na plano ng DA na itaas ang alokasyon para sa meat processors sa 40,000 MT, habang ang natitirang bahagi ay ilalaan sa Food Terminals Inc. upang magkaroon ng sapat na resources para makialam sa merkado at mapanatili ang matatag na presyo ng baboy.
Bilang bahagi ng hakbang upang mapababa ang presyo ng baboy sa pamilihan, ipinatutupad ng DA ang maximum suggested retail price (MSRP) sa pork: P380 kada kilo ng liempo at P350 kada kilo ng pigue at kasim. Samantala, ang MSRP para sa mga fresh carcass o “sabit ulo” ay nakapirmi sa P300 kada kilo.
Ang reporma sa MAV ay bahagi ng mas malawakang hakbang ng DA upang matiyak ang patas na kompetisyon at matugunan ang mga hamon sa industriya ng baboy sa bansa.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanillahttps://tutubi.ph/author/carlojpf/
- Carlo Juancho Funtanillahttps://tutubi.ph/author/carlojpf/
- Carlo Juancho Funtanillahttps://tutubi.ph/author/carlojpf/
- Carlo Juancho Funtanillahttps://tutubi.ph/author/carlojpf/
