Sa gitna ng pinsalang dulot ng super typhoon Egay sa lalawigan ng Cagayan at iba pang bahagi ng bansa, nakipagpulong si Pangulong Ferdinand Marcos Jr. sa mga lokal na opisyal ng Tuguegarao upang masusing talakayin ang mga hakbang na kinakailangang gawin upang matugunan ang mga epekto ng bagyo.
Ayon kay Cagayan Governor Manuel Mamba, as of July 28 ay nakapagtala ang lalawigan ng 20 kataong sugatan dahil sa bagyo. Sa kabutihang palad, wala namang ulat ng nasawi. Subalit, aabot sa 83 bahay ang nasira at mahigit sa 1,500 bahay naman ang napinsala ng bagyo sa lalawigan.
Dagdag pa ni Gobernador Mamba, umabot sa mahigit P539 milyon ang agricultural damage sa Cagayan, kabilang na ang pinsala sa mga pananim gaya ng bigas, mais, high-value crops, at palaisdaan. Samantala, aabot naman sa mahigit P1 milyon ang halaga ng napinsalang hayop tulad ng alagang baka at baboy.
Lumampas naman sa P862 milyon ang halaga ang infrastructure damage sa buong lalawigan, na kinabibilangan ng mga kalsada, tulay, at iba pang imprastraktura.
Nilinaw ng Pangulo na ang dalawang pangunahing pangangailangan ng lugar na apektado ay ang suplay ng kuryente at ang sektor ng agrikultura. Binigyang-diin niya na mahalagang maibalik agad ang suplay ng kuryente upang matulungan ang mga residente at mga negosyo na maibalik ang normal na operasyon.
Inaasahan din ng Pangulo na ang sektor ng agrikultura ay mabilis na makabangon, lalo na sa mga high-value crops na maaaring magkaroon ng pag-asa sa loob ng 45 araw. Pangako rin ng Pangulo na magbibigay siya ng suporta sa muling pagtanim ng mga high-value crops.
Sa kabila ng mga pagbabagong ito, ipinag-utos ni Pangulong Marcos sa lokal na pamahalaan na magpadala ng detalyadong report ukol sa agricultural damage upang maging basehan sa pagtugon ng national government sa mga pangangailangan ng mga apektadong sektor.
Gayundin, inamin ng Pangulo na labis siyang nag-aalala sa posibilidad na tumaas ang presyo ng bigas kahit na umangkat na nito ang bansa. Binigyang-diin niya na maraming bansa sa Southeast Asia ang nag-aagawan na rin sa supply ng bigas, at ito ang magiging hamon para sa pandaigdigang merkado.
“Ang hirap nito because yung palay, iniisip ko na ang supply natin pag nag El Niño talaga. I’m thinking about the national supply for rice because iniimport lahat ng Indonesia, nagsara ang Vietnam, India nagsara. We have to start importing already,” ayon sa kanya.
Sa kabuuan, nagsagawa ng matinding pagpupulong ang Pangulo at mga lokal na opisyal upang matugunan ang mga pangangailangan ng mga apektadong residente at makabangon muli ang lalawigan ng Cagayan at iba pang lugar na naapektuhan ng bagyong Egay. Patuloy pa rin ang pagmumungkahi ng mga hakbang upang masiguro ang agarang pagbangon at rehabilitasyon ng mga komunidad.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
