Tinututukan na ng National Dairy Authority (NDA) at ng Pamahalaang Lungsod ng San Pablo ang pagpapalakas ng lokal na industriya ng gatas bilang bahagi ng pambansang programa para sa nutrisyon at agrikultura.
Sa pagbisita ni NDA Administrator Atty. Marcus Antonius T. Andaya kay Mayor Najie B. Gapangada Jr., tinalakay ng dalawang opisyal ang planong ilunsad sa 2026 ang industriya ng gatas sa lungsod. Kasama ni Andaya ang mga opisyal mula sa CALABARZON regional office ng NDA na nakabase sa Lipa City.
Isa sa mga pangunahing paksa ng pagpupulong ang nakatakdang National Milk Feeding Program sa mga pampublikong paaralan sa buong bansa simula 2026. Ipatutupad ito sa pakikipagtulungan ng mga lokal na pamahalaan at pribadong sektor upang labanan ang malnutrisyon sa mga mag-aaral.
Ayon sa NDA, maaaring makilahok ang mga korporasyon at dayuhang mamumuhunan sa programa bilang mga donor. Ang kanilang kontribusyon ay maaaring ibawas sa buwis, at maaari rin silang pumili ng kanilang mga target na benepisyaryo. Kasabay ng feeding program, ilulunsad din sa San Pablo ang lokal na industriya ng gatas na layong makatulong sa pambansang produksyon at makapagbigay ng kabuhayan sa mga magsasaka.
Ipinaliwanag ni Administrator Andaya na ang NDA ay attached agency ng Department of Agriculture (DA) na responsable sa pagpapaunlad ng sektor ng dairy farming. Layunin nitong bawasan ang pag-angkat ng gatas mula sa ibang bansa at itaguyod ang mas malusog na mamamayan sa pamamagitan ng lokal na gatas.
Kabilang sa mga programa ng NDA ang pagpapalawak ng mga dairy multiplier farms at kooperatiba, pagpapabuti ng lahi ng mga baka at kalabaw na gatasan, pagbibigay ng pagsasanay at teknikal na tulong sa mga magsasaka, at pagpapatupad ng extension services para sa maayos na pamamahala, koleksyon, at pagproseso ng gatas. Saklaw din ng ahensya ang pagpapaunlad ng dairy value chain, pagtatayo ng mga pasilidad para sa milk processing, packaging, at marketing, at pagtatakda ng pamantayan para sa kaligtasan at kalidad ng produktong gatas.
Kasabay nito, inihayag ng Department of Agriculture na binabalangkas nito ang mga hakbang upang palakasin ang lokal na produksiyon ng gatas sa buong bansa. Sa isang pagpupulong kasama ang Philippine Chamber of Agriculture and Food Inc. (PCAFI), sinabi ni Agriculture Secretary Francisco P. Tiu Laurel Jr. na rerepasuhin ng kagawaran ang Republic Act 7884 o National Dairy Development Act of 1995 upang buhayin ang probisyon nito na nag-aatas sa mga komersyal na milk processor at lokal na dairy cooperative na magkasundo sa dami ng gatas na dapat bilhin mula sa lokal na produksyon.
Bagama’t ipinasa ang batas noong 1995, nananatiling mababa ang lokal na produksiyon ng gatas, na mas mababa sa isang porsiyento ng taunang pangangailangan ng bansa. Noong 2023, umabot lamang sa 17,850 metric tons ang lokal na produksiyon ng gatas, katumbas ng 0.8 porsiyento ng kabuuang konsumo na tinatayang nasa 1.937 milyong metric tons.
Iminungkahi ng PCAFI na magtakda ang DA, sa pamamagitan ng NDA, ng patakaran na mag-oobliga sa mga komersyal na milk processor at trader na kumuha ng hindi bababa sa limang porsiyento ng kanilang kabuuang pangangailangan mula sa lokal na pinagmumulan ng gatas. Kung hindi ito maisasakatuparan, inirerekomenda ng grupo na magpatupad ang pamahalaan ng safeguard duty o karagdagang buwis sa imported milk upang pondohan ang pag-unlad ng lokal na industriya, o kaya’y obligahin ang mga kompanya na magtayo ng sarili nilang dairy farms sa Pilipinas.
Sa panig ng San Pablo, nakatakdang bumuo ng Local Dairy Development Program bilang bahagi ng agricultural agenda ng lungsod. Maglalaan din ito ng pondo bilang counterpart support sa mga proyekto ng NDA, at magtatatag ng LGU–NDA Coordinating Team upang matiyak ang maayos na implementasyon at monitoring.
Isasama ng City Government ang paggamit ng lokal na gatas sa mga feeding at nutrition program nito, at magsasagawa ng kampanya upang hikayatin ang suporta ng publiko sa mga produktong gawang Pilipino.
Naniniwala sina Administrator Andaya at Mayor Gapangada na sa pamamagitan ng matatag na ugnayan ng NDA, Department of Agriculture, at Pamahalaang Lungsod ng San Pablo, maisusulong ang isang self-sufficient, business-friendly, at health-conscious na komunidad na nakikinabang sa sariling produktong Pilipino.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
