SAN PABLO CITY — Bumisita kamakailan kay San Pablo City Mayor Najie B. Gapangada Jr. ang mga pinakamataas na opisyal militar sa rehiyon ng CALABARZON upang talakayin ang mga hakbang sa seguridad bilang paghahanda sa pagpapaunlad ng lungsod bilang ligtas na destinasyon para sa mga mamumuhunan.
Pinangunahan ni Lieutenant General Cirilo C. Balaoro Jr., Commander ng Armed Forces of the Philippines–Southern Luzon Command (SOLCOM), ang pagbisita. Sinasaklaw ng SOLCOM ang mga rehiyon ng Southern Tagalog at Bicol. Kasama rin niya si Brigadier General Ernest John C. Cadloc, Commander ng 202nd Brigade ng Philippine Army, na nakatalaga sa mga lalawigan ng Batangas, Cavite, Laguna, at bahagi ng rehiyon ng Bicol.
Sina General Balaoro at Mayor Najie ay kapwa nagtapos ng Masteral Degree in National Security Administration mula sa National Defense College of the Philippines.
Ayon kay General Balaoro, ang kanilang pagbisita ay bahagi ng proaktibong hakbang upang matiyak ang seguridad ng mga inaasahang pamumuhunan sa itatayong agri-industrial economic zone ng San Pablo City.
Binigyang-diin niya na, “Ang seguridad ay isang mahalagang bahagi ng pag-unlad ng ekonomiya,” at kailangang magkaroon ng maayos na plano upang maprotektahan ang mga dayuhan at lokal na kumpanyang magtatayo ng negosyo sa lungsod.
Sampalok Lake sasailalim sa ecorest
Samantala, naglabas ng abiso ang Pamahalaang Lungsod kaugnay ng pansamantalang pahinga ng Sampalok Lake bunsod ng isinasagawang road at slope protection project ng Department of Public Works and Highways (DPWH).
Batay sa konsultasyon at apela ng mga samahan ng mga vendor, inaprubahan ni Mayor Najie ang mga sumusunod na iskedyul at patakaran:
Oktubre 7–12:
• Papayagan ang mga vendor na magtinda mula 5:00 ng hapon hanggang 10:00 ng gabi.
• Nangako ang mga vendor na sila mismo ang magpapatupad ng kaayusan at titiyaking hindi makahahadlang ang kanilang mga puwesto sa operasyon ng DPWH o sa daloy ng trapiko.
• Papayagan din ang publiko na bumisita sa Sampalok Lake, alinsunod sa mga ipatutupad na safety protocols.
Oktubre 13–19:
• Magsisimula ang DPWH ng pag-aaspalto sa mga kalsadang nakapalibot sa lawa.
• Pansamantalang ititigil ang operasyon ng mga vendor at aalisin muna ang kanilang mga puwesto upang hindi maantala ang proyekto.
• Pinapayuhan ang publiko na iwasang bumisita sa lawa para sa kaligtasan ng lahat.
Nagpahayag ng pasasalamat ang Pamahalaang Lungsod ng San Pablo sa pang-unawa at kooperasyon ng publiko habang isinasagawa ang mga hakbangin para sa kaligtasan at pagpapaganda ng paligid ng Sampalok Lake.
Ayon kay Mayor Najie, ang mga proyektong ito ay bahagi ng layunin ng pamahalaang lokal na gawing world-class tourist destination ang San Pablo City.
With reports from Rolando Inciong, City Information Officer, San Pablo City
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
