Nakataas ang Tropical Cyclone Wind Signal No. 1 sa ilang lugar sa Luzon habang bahagyang lumakas ang Tropical Depression Neneng, ayon sa Philippine Atmospheric, Geophysical and Astronomical Services Administration (PAGASA) kahapon.
Ang Batanes, Cagayan kasama ang Babuyan Islands, ang silangang bahagi ng Apayao (Luna, Santa Marcela, Flora, Pudtol), at ang hilagang bahagi ng Isabela (Santa Maria, San Pablo, Maconacon) ay makakaranas ng malakas na hangin hanggang sa medyo malakas na hangin.
Taglay ni Neneng ang lakas ng hanging aabot sa 55 kph malapit sa gitna, at pagbugsong aabot sa 70 kph. Huling natunton ito sa 795 km. silangan ng Calayan, Cagayan.
Tinataya ng PAGASA na magdadala si Neneng ng mahina hanggang sa katamtaman na kung minsan ay malakas na pag-ulan sa Batanes, Cagayan kabilang ang Babuyan Islands, Apayao, Kalinga, at Ilocos Norte ngayong araw ng Sabado.
Maaari ring mag-landfall si Neneng o maaaring dumaan malapit sa Babuyan Islands o Batanes sa Linggo.
Samantala, sinabi ng PAGASA na kasalukuyang nagdudulot si Neneng ng kalat-kalat na pag-ulan at pagkidlat-pagkulog sa rehiyon ng Bicol, Mimaropa, Kanlurang Visayas, Zamboanga Peninsula, mga lalawigan ng Samar, Biliran, Basilan, Sulu, Tawi-Tawi, Cagayan, at Batanes.
Ang mga flash flood o landslide ay malamang sa mga lugar na ito dahil sa katamtaman hanggang sa kung minsan ay malakas na pag-ulan.
Pinayuhan ng PAGASA ang mga bangkang pangisda at iba pang maliliit na sasakyang pandagat na huwag makipagsapalaran sa dagat, at ang mga malalaking sasakyang pandagat ay inaalerto laban sa malalaking alon.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
