MAYNILA. Itinaas na ang Signal No. 2 sa 15 lugar sa Luzon habang papalapit na ang Severe Tropical Storm Nika sa typhoon category, ayon sa PAGASA kanina, Linggo ng hapon.
Ayon sa PAGASA, inaasahang makakaranas ng hangin na may lakas na 39 hanggang 61 km/h sa loob ng 36 oras o paminsan-minsang pag-ulan na posibleng magdulot ng kaunting pinsala o wala sa mga mababang risk na istruktura. Sinabi rin ng PAGASA na ang pinakamataas na signal na maaaring itaas habang nararanasan si Nika ay Signal No. 4.
Nitong 4:00 ng hapon, namataan si Nika 380 km silangan ng Infanta, Quezon at kumikilos sa direksyong kanluran sa bilis na 20 km/h. Nagbabala rin ang PAGASA na may posibilidad ng malalakas hanggang galeforce na hangin sa baybaying dagat at kabundukan ng Batanes, Batangas, Marinduque, Romblon, Camarines Sur, at Catanduanes sa Lunes dahil sa northeasterly wind flow.
Nagbigay din ng babala ang PAGASA sa moderate hanggang high risk ng storm surge sa loob ng susunod na 48 oras sa mga mabababang lugar o baybaying bahagi ng Ilocos Norte, Ilocos Sur, La Union, Pangasinan, Cagayan kasama ang Babuyan Islands, Isabela, Zambales, Aurora, Quezon kasama ang Polillo Islands, Camarines Norte, Camarines Sur, at Catanduanes.
Sa kasalukuyan, mayroon ding nakataas na gale warning sa silangang bahagi ng Southern Luzon.
Ayon sa PAGASA, inaasahan na aabot sa typhoon category si Nika ngayong Linggo at posibleng maabot ang pinakamataas na lakas bago mag-landfall. “A short period of weakening is expected as Nika traverses the landmass of Luzon due to land interaction. Re-intensification may occur over the West Philippine Sea,” ayon sa PAGASA.
Nakikita ring patuloy na kikilos si Nika sa direksyong kanlurang hilagang-kanluran sa kabuuan ng forecast period at posibleng mag-landfall sa Isabela o Aurora sa umaga o hapon ng Lunes. Tatawid ito sa kabundukan ng Northern Luzon at lalabas sa West Philippine Sea sa gabi ng Lunes, patuloy na kikilos patungo sa kanlurang hilagang-kanluran at inaasahang lalabas sa Philippine Area of Responsibility sa Martes ng hapon o gabi.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
