Paete, Laguna. Nagsagawa ang Department of Trade and Industry-DTI Laguna sa pamamagitan ng Negosyo Center Paete at katuwang ng LGU Paete ng SME Roving Academy (SMERA) na pinamagatang “Seminar on Setting-up a Business and Orientation of DTI Programs and Services” kasama ang Sangguniang Barangay ng Bagumbayan para sa potensyal at nago-operate na micro, small, and medium-sized enterprises (MSMEs) ng kanilang barangay.
Layunin nito na maibigay sa mga potensyal at umiiral na MSMEs sa Barangay Bagumbayan ang kaalaman kung paano mabisang masisimulan ang kanilang negosyo. Gayundin ang magbigay ng mga kinakailangang alituntunin at pamamaraan sa pag-set up ng isang negosyo. Ang mga MSME sa pamamagitan ng DTI SME Roving Academy ay nagtuturo kung paano ito makakatulong sa mga negosyo na makilala ang iba’t ibang ahensya ng gobyerno na may kinalaman sa pagpaparehistro ng negosyo, legalisasyon, at financing.
Bago magsimula ang seminar, nagbigay ng maikling inspirational message si Barangay Chairman Gloria Madriguerra para sa mga MSMEs na dumalo sa aktibidad na opisyal na binuksan ni Apple Plopino, Negosyo Center Business Counselor Paete.
Nagbigay siya ng sunud-sunod na gabay na: 1) pagsusuri sa sarili; 2) pagsusuri sa kapaligiran ng negosyo; 3) pagpili ng anyo at uri ng negosyo; 4) pagbuo ng isang kongkretong plano sa negosyo; 5) pagkuha ng kapital; 6) pagtukoy sa mga ahensya ng gobyerno at non-government para sa tulong; 7) pagpili ng lokasyon ng negosyo; 8) pagpaparehistro ng negosyo at 9) pagkuha at pagsasanay ng mga empleyado. Tinalakay din niya ang iba’t ibang programa at serbisyo ng DTI, tulad ng Consumer Welfare and Protection, SME Development Programs and Services, at Market Development.
Nakatanggap ang seminar ng mga positibong komento mula sa mga kalahok at ipinahayag nila ang kanilang kasiyahan sa aktibidad ng pagkatuto. Lahat ng mga kalahok na sumagot sa Client Satisfaction Form ay nagmarka na nakapasa ito.
Sa pangkalahatan, ang programa ng SMERA ay pinuri ng mga potensyal at kasalukuyang MSMEs, at sila ay nalulugod na sumali sa mga susunod pang mga seminar, mentoring, at coaching session ng Negosyo Center Paete.
Dumalo sa seminar ng Negosyo Center Paete apatnapu’t pitong (47) potensyal at umiiral na MSME mula sa Barangay Bagumbayan sa Paete.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
