MAYNILA. Darating sa Pilipinas ngayong araw, Oktubre 6, 2024, si Republic of Korea (ROK) President Yoon Suk Yeol kasama ang First Lady Kim Keon Hee, bilang bahagi ng kanilang opisyal na pagbisita na tatagal hanggang bukas, Oktubre 7, 2024.
Si Pangulong Yoon ay personal na sinalubong ni Pangulong Ferdinand Marcos Jr. at Unang Ginang Louise Araneta-Marcos sa isang seremonya sa Malacañang. Ang pagbisita ay kasabay ng ika-75 anibersaryo ng pagkakatatag ng diplomatikong relasyon sa pagitan ng Pilipinas at South Korea, na nagsimula noong Marso 1949.
Magkakaroon ng bilateral meeting ang dalawang lider upang talakayin ang mga larangan ng kapwa interes, kabilang ang kooperasyon sa pulitika, seguridad at depensa, maritime, ekonomiya, at pagpapaunlad. Kasama rin sa agenda ang pagpapalakas ng ugnayan ng mga tao mula sa parehong bansa, gayundin ang mga usaping pangtrabaho at konsular.
Inaasahan na magpapalitan ng mga pananaw sina Pangulong Marcos at Pangulong Yoon ukol sa mga mahahalagang isyu sa rehiyon at pandaigdigang kalagayan. Ayon sa isang pahayag, layon ng pagbisita na muling pagtibayin ang masiglang relasyon sa pagitan ng Pilipinas at South Korea.
Ang pagbisita ni Pangulong Yoon ay itinuturing na makasaysayan, dahil ito ang kauna-unahang standalone bilateral visit ng isang Pangulo ng South Korea sa Pilipinas mula noong 2011.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
