Tuloy ang mandatory face-to-face classes simula sa Nobyembre 2, sa kabila ng mga banta ng bagong coronavirus disease 2019 (Covid-19) omicron XBB at XBC subvariants, ayon sa Department of Education (DepEd).
Sa isang panayam sa radyo, sinabi ni DepEd spokesperson Michael Poa na sa kabila ng pagtuklas ng XBB at XBC omicron subvariants sa bansa, mananatiling epektibo ang Department Order (DO) 44.
“Sa ngayon, wala po tayong pagbabago doon sa amendatory DO na na-issue po natin last Monday,” ayon sa kanya.
Sa ilalim ng DO 44, lahat ng pampublikong paaralan ay kinakailangang magsagawa ng limang araw na in-person classes maliban sa mga naapektuhan ng mga sakuna o kalamidad, o binigyan ng exemption ng mga regional office.
Samantala, ang mga pribadong paaralan ay malaya sa kanilang flexible learning options, dahil kinikilala ng DepEd ang kanilang pamumuhunan sa in-person learning setup at mga hamon sa paglipat sa purong face-to-face na mga klase.
Sinabi ni Poa na tinutugunan ng in-person learning ang mga gaps sa pag-aaral at ang mga pangangailangan sa kalusugan ng isip ng mga mag-aaral, partikular na ang kanilang pangangailangang pisikal na makipag-ugnayan sa kanilang mga guro at kaklase.
Tiniyak niya sa mga magulang na ang mga alituntunin laban sa anumang banta na may kaugnayan sa Covid-19 ay nakaayos na upang matiyak ang kaligtasan ng kanilang mga anak.
“Ang Covid naman po, talagang ang position natin is hindi natin siya binabalewala. That’s why we have the health guidelines na nilabas po natin. Binase kasi natin ito sa mga studies na talagang mas makakabuti, advantageous ang in-person classes pagdating po sa pag-aaral ng ating mga learners,” ayon sa kanya.
Muling iginiit ng DepEd na ang mga in-person classes ay nagbibigay pa rin ng mga pakinabang para sa kapakanan ng mga mag-aaral.
Noong Martes, pinasalamatan ng Coordinating Council of Private Educational Associations of the Philippines (COCOPEA) ang DepEd sa hakbang nitong panatilihin ang mga opsyon para sa in-person, blended, at distance learning para sa lahat ng pribadong paaralan sa buong bansa.
Sinabi ng DepEd na pinag-aaralan nila ngayon na i-institutionalize ang blended learning setup sa bansa, na may target na matugunan ang kakulangan sa silid-aralan at iba pang mga pangmatagalang problema na karaniwang nararanasan sa panahon ng kalamidad.
Samantala, sinabi ng isang health reform advocate na ang panuntunan sa opsyonal na pagsusuot ng mga maskara sa mukha ay dapat na muling pag aralan kung isinasaalang-alang ang banta ng mga subvariant ng Omicron.
“Kasi ‘yung kids kasi huli silang nabakunahan, mababa ang ating update and nagfe-face-to-face classes sila. But ang concern is the Executive Order No. 3, kung optional ‘yan, that’s a problem na baka we need to suspend that, at least for the next two weeks and observe kasi kung hindi natin ‘yan irere-evaluate that will be a problem for all of us, airborne kasi siya,” ayon kay Dr. Tony Leachon.
Nauna rito, sinabi ni Poa na ang mga estudyante ay kinakailangan pa ring magsuot ng face mask sa loob ng mga silid-aralan o anumang mga enclosed space, ngunit maaaring alisin ito sa mga open space. (PNA)
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
