MAYNILA – Sinabi ng Department of Transportation na hindi na papayagang bumaybay sa mga pangunahing kalsada ang mga e-bike at e-trike simula Disyembre, bilang bahagi ng mas mahigpit na regulasyon sa paggamit ng mga electric vehicle.
Ayon kay Sen. JV Ejercito, budget sponsor, nangako ang hepe ng Land Transportation Office at Assistant Secretary na si Markus Lacanilao na sisimulan na ang paghuli sa mga e-trike na gumagamit ng mga national road sa susunod na buwan.
Suportado ni Sen. Raffy Tulfo ang hakbang. Aniya, nabibigatan ang mga tradisyunal na tricycle driver na sumusunod sa prangkisa, pagpaparehistro, lisensya, insurance at iba pang rekisito, habang ang mga e-bike at e-trike operator ay hindi dumaraan sa parehong proseso ngunit nakikigamit ng parehong road space.
Idinagdag niya na nagiging hamon sa mga awtoridad ang pag-isyu ng citation kapag nalalabag ng mga e-vehicle ang batas trapiko o nasasangkot sa aksidente.
Inihayag ng LTO na anumang e-bike o e-trike na masasangkot sa insidente ay agad na i-impound. Nilinaw naman ni Tulfo na hindi siya laban sa paggamit ng e-vehicles, ngunit dapat lamang itong gamitin sa mas ligtas na lugar at hindi sa mga pangunahing lansangan.
Sumang-ayon si Ejercito, na sinabing maaaring payagan ang mga ito sa loob ng barangay at subdivision, subalit mananatiling bawal sa mga malalaking kalsada.
Hinimok ni Tulfo ang LTO na makipag-ugnayan sa mga lokal na pamahalaan sa pamamagitan ng Department of the Interior and Local Government upang maiwasan ang kalituhan sa mga gumagamit.
Sinabi ni Ejercito na makikipagpulong sina Transportation Secretary Giovanni Lopez at mga opisyal ng LTO sa DILG, at magsisimula ang pagpapabatid sa mga LGU ngayong Biyernes.
Dagdag niya na magsasagawa ang DOTr at LTO ng pag-aaral at public consultation hinggil sa registrability at safety ng e-bikes at e-trikes bago magtakda ng pangmatagalang patakaran.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
