MAYNILA – Naghahanda ang Office of the Ombudsman na magsampa ng kasong plunder laban kina dating Speaker Martin Romualdez at dating Senate President Francis Escudero kaugnay ng umano’y anomalya sa mga proyektong flood control.
Sa isang press conference noong Lunes, sinabi ni Ombudsman Jesus Crispin Remulla na masusing inihahanda ang kaso at may indikasyon ng sabwatan. “We have been zealously preparing a case of plunder case against former Speaker Martin Romualdez and former SP Chiz Escudero. There’s conspiracy involved,” aniya.
Dagdag pa niya, ang kaso ay may kinalaman sa mga proyektong flood control. “This [case] is flood control related in so many ways,” paliwanag ni Remulla, na nagsabing target nilang maisampa ang kaso “within the month of May.”
Sa panig naman ni Romualdez, iginiit ng kanyang abogado na si Ade Fajardo na wala umanong ebidensyang nag-uugnay sa mambabatas sa mga “ghost” at substandard na proyekto. “We want to emphasize that, to date, there is no evidence linking Rep. Romualdez to any ghost and substandard projects pertaining to the flood control issue,” ayon sa kanyang pahayag.
Dagdag pa niya, nananatili silang kumpiyansa na mareresolba ang usapin batay sa ebidensya at due process, hindi sa pulitika o haka-haka.
Nauna nang itinanggi nina Romualdez at Escudero ang anumang pagkakasangkot sa umano’y anomalya sa flood control projects.
Sa kasalukuyan, tatlong batch pa lamang ng mga kaso kaugnay ng flood control ang naisampa ng Ombudsman mula nang simulan ang imbestigasyon noong Setyembre 2025.
Kabilang dito ang mga kasong malversation at graft laban sa dating Ako Bicol Party-list Representative Zaldy Co at hindi bababa sa 15 iba pa kaugnay ng P289 milyong substandard road dike project sa Oriental Mindoro; laban sa contractor na si Sarah Discaya at iba pa para sa P96.5 milyong umano’y ghost flood control project sa Davao Occidental; at laban kay dating senador Ramon Bong Revilla Jr., dating DPWH Bulacan Assistant District Engineer Brice Hernandez, at lima pang iba kaugnay ng P92.8 milyong umano’y ghost project sa Pandi, Bulacan.
Patuloy ang imbestigasyon ng Ombudsman habang inaasahang lilinaw sa mga susunod na linggo ang detalye ng posibleng pagsasampa ng kasong plunder laban sa mga sangkot.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
