MAYNILA — Hinimok ni Pangulong Ferdinand “Bongbong” Marcos Jr. noong Sabado ang mga kumpanya ng langis na ipatupad nang buo at walang pagkaantala ang inaasahang malakihang rollback sa presyo ng petrolyo, sa gitna ng inaasahang pagbawas sa pump prices sa susunod na linggo.
Sa isang video message, sinabi ni Marcos na inaasahang bababa ang presyo ng diesel ng ₱24.94 kada litro, gasolina ng ₱3.41 kada litro, at kerosene ng ₱2.00 kada litro. Ayon sa kanya, magdudulot ito ng ginhawa sa mga pamilyang Pilipino na patuloy na naaapektuhan ng mataas na gastos sa gasolina at krudo.
“Mas malaki ito kaysa sa rollback noong nakaraang linggo at malinaw ang ibig sabihin nito para sa ating lahat. May ginhawang parating,” ani Marcos.
Nanawagan din ang Pangulo sa mga oil company na tiyaking maipatutupad ang buong bawas-presyo nang tama at walang delay.
“Sa ating mga oil companies, malinaw ang aking panawagan. Ipatupad ninyo ang rollback nang buo, tama, at walang pagkaantala. Ibigay ninyo sa taumbayan ang dapat naman na nasa kanila,” dagdag niya.
Nauna dito, sinabi ng Department of Energy na posible pang magkaroon ng panibagong rollback sa presyo ng langis sa susunod na linggo. Karaniwang inaanunsyo ng mga kumpanya ng langis ang opisyal na price adjustment tuwing Lunes at ipinatutupad ito kinabukasan.
Para naman sa sektor ng transportasyon, magpapatuloy ang ₱10 fuel discount para sa mga public utility vehicle at bus, gayundin ang Service Contracting Program para sa mga drayber.
Binigyang-diin ni Marcos na dapat agad maramdaman ng publiko ang epekto ng pagbaba ng presyo ng langis.
“Ang bawat sentimo na ibinababa ay dapat maramdaman ng bawat Pilipino. Alam natin kung gaano kahalaga ang oras ng bawat kababayan. Ang oras ay dapat para sa pamilya, sa eskwela, at sa trabaho, hindi sa pila,” aniya.
Inanunsyo rin ng Pangulo na palalawigin ng Land Transportation Office ang validity ng mga lisensya at rehistro ng sasakyan na mag-e-expire sa Abril 2026, ng karagdagang tatlong buwan, dahil sa umiiral na krisis sa Middle East. Walang ipapataw na surcharge, multa, o penalty sa extension.
Saklaw ng palugit ang driver’s at conductor’s licenses, student-driver’s permits, at motor vehicle registration.
“Batid namin ang sitwasyon ng bawat Pilipino sa panahong ito. Hindi tayo titigil, hindi tayo uurong, at hindi natin hahayaan na ang ginhawang ito ay hindi makarating sa taumbayan,” ani Marcos.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
