MAYNILA — Inilunsad ng Philippine Atmospheric, Geophysical and Astronomical Services Administration (PAGASA) ang bagong mobile application na PANaHON (PAGASA National Hydro-Meteorological Observing Network) upang magbigay ng mas mabilis at halos real-time na impormasyon tungkol sa lagay ng panahon sa buong bansa.
Inanunsyo ang paglulunsad ng app noong Lunes bilang bahagi ng pagdiriwang ng Typhoon and Flood Awareness Week mula Hunyo 14 hanggang 20. Layunin ng bagong platform na palawakin ang access ng publiko sa mahahalagang weather data kabilang ang ulan, temperatura, heat index, at mga babala sa sakuna.
Ayon sa PAGASA, ang PANaHON app ay magbibigay ng agarang abiso sa mga user hinggil sa tropical cyclone bulletins, thunderstorm at malalakas na pag-ulan, gayundin sa mga flood advisory.
Sinabi ni PAGASA Information Officer Loren Joy Estrebillo na malaking bahagi ng kanilang audience ay gumagamit na ng mobile devices para sa weather information, kaya idinisenyo ang app upang gawing mas madaling ma-access ang mga datos ng panahon.
Kabilang sa mga pangunahing feature ng PANaHON app ang location-based services na nagbibigay-daan sa paggamit ng kasalukuyang lokasyon, pag-save ng paboritong lugar, at paghahanap ng anumang lugar sa Pilipinas. Mayroon din itong weather outlook na may hourly at daily forecast, pati na 5-day weather outlook para sa piling lungsod at tourist destinations.
Nagtatampok din ito ng interactive map na nagpapakita ng mga babala tulad ng thunderstorms, heavy rainfall, tropical cyclones, at pagbaha gamit ang radar at satellite data. Ayon sa PAGASA, mas pinadali rin ng app ang pagtingin sa gridded forecasts at iba pang weather variables sa pamamagitan ng zoom-in at zoom-out functions.
Tiniyak ng ahensya na sumusunod ang PANaHON app sa Data Privacy Act sa pangangalaga ng impormasyon ng mga gumagamit.
Ang bagong application ay magsisilbing karagdagang platform ng PAGASA para sa weather updates at forecasting na maaaring makatulong sa mas maagap na paghahanda ng publiko sa mga sakuna at pagbabago ng panahon.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
