MAYNILA — Suportado ng Philippine National Police (PNP) ang panukalang ibaba mula 15 tungo sa 12 taong gulang ang minimum age of criminal responsibility, kasunod ng muling pag-igting ng mga diskusyon hinggil sa pagkakasangkot ng ilang menor de edad sa mga krimen sa bansa.
Ayon sa PNP, layunin ng panukala na mas mapalakas ang pagpapatupad ng batas at matugunan ang mga kaso kung saan nasasangkot ang mga kabataan sa mga paglabag sa kriminal na batas.
Sa isang Palace briefing, sinabi ni PNP spokesperson Col. Allen Rae Co na bukas ang organisasyon sa naturang pagbabago sa ilalim ng umiiral na Juvenile Justice and Welfare Act.
“The PNP is supporting the lowering of the age of criminal responsibility,” ani Co. “We are thinking 12 years old.”
Dagdag niya, patuloy pa ring isinasailalim sa masusing pagsusuri ng mga awtoridad ang bawat kaso upang matukoy kung ang isang menor de edad ay kumilos nang may discernment o may sapat na pag-unawa sa kalikasan at epekto ng kaniyang ginawa, na isa sa mga pamantayan sa ilalim ng kasalukuyang batas.
Samantala, sinabi ng Malacañang na pag-aaralang mabuti ni Pangulong Ferdinand R. Marcos Jr. ang anumang panukalang mag-aamyenda sa Juvenile Justice and Welfare Act.
Ayon kay Palace Press Officer Claire Castro, maaaring suportahan ng Pangulo ang mga reporma sa batas kung makatutulong ang mga ito sa pagpapatibay ng pagpapatupad ng batas habang patuloy na pinangangalagaan ang kapakanan ng mga kabataan.
Binigyang-diin din ng Palasyo ang mga umiiral na hamon sa implementasyon ng intervention programs para sa mga menor de edad, kabilang ang mga pagkakataong may maling paniniwala na hindi sila maaaring managot sa ilalim ng batas.
Muling napagtuunan ng pansin ang usapin ng juvenile justice kasunod ng isang insidente sa San Jose National High School sa Tacloban City, kung saan dalawang menor de edad na suspek ang sangkot sa pamamaril na ikinasawi ng tatlong estudyante at ikinasugat ng 20 iba pa.
Patuloy na nananatiling paksa ng diskusyon sa Kongreso at sa mga ahensya ng pamahalaan ang balanse sa pagitan ng rehabilitasyon ng kabataan at pagpapatupad ng pananagutang legal sa mga mabibigat na kaso.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
